Fitch Ratings халықаралық рейтингтік агенттігі ForteBank-тің шетел және ұлттық валютадағы ұзақ мерзімді кредиттік рейтингін «BB» деңгейінде растады. Рейтинг бойынша болжам «Тұрақты» күйінде сақталды. Банктің дербес қаржылық тұрақтылығын көрсететін Viability Rating көрсеткіші де «bb» деңгейінде қалды, деп жазады Ertenmedia.kz.
Агенттік рейтингтің расталуын ForteBank-тің Home Credit Bank-ті сатып алғаннан кейінгі нарықтық позициясының нығаюымен байланыстырды. Сонымен қатар банктің жоғары табыстылығы мен өтімділік деңгейінің тұрақтылығы ескерілген. Fitch Ratings бағалауынша, біріккен банктің активтер нарығындағы үлесі 9,1 пайызға дейін ұлғайған.
Нарықтағы үлестің артуы ForteBank-тің бәсекелестік артықшылығын күшейтіп, Қазақстандағы жүйе құраушы банктердің қатарына қосылу мүмкіндігін кеңейтеді. Агенттік Home Credit Bank-ті сатып алудан туындайтын синергиялық әсерге де оң баға берді. Бірігу кросс-сатылымды кеңейтіп, операциялық тиімділікті арттыруға және жекелеген бизнес-процесті оңтайландыруға мүмкіндік береді.
Fitch Ratings аталған артықшылықтар банкке қосымша құн қалыптастырады деп есептейді. Агенттік синергиялық тиімділік алдағы бірнеше жыл ішінде кезең-кезеңімен толық жүзеге асады деген болжам жасады. Бірігу нәтижесі ForteBank-тің әмбебап бизнес-моделін одан әрі күшейтуге тиіс.
Есепте банктің капитал базасын нығайту саясаты да жоғары бағаланған. Fitch Ratings 2026 жылғы маусымда ForteBank капиталының 46,1 миллиард теңгеге ұлғайтылғанын ескерді. Агенттік 2026–2027 жылдары капиталдандыру көрсеткіштері одан әрі жақсарады деп болжап отыр.
ForteBank-тің қорландыру базасы мен өтімділік қоры да рейтингтік бағалауда маңызды фактор болды. 2025 жылы банктегі бөлшек депозиттер көлемі 49 пайызға өскен. Home Credit Bank-пен бірігудің синергиялық әсері ресурстық базаны одан әрі әртараптандыруға жол ашты.
ForteBank басқарма төрағасы Талғат Қуанышев рейтингтің расталуын банк бизнес-моделінің тұрақтылығына берілген тәуелсіз баға деп атады. Оның сөзінше, агенттік нарықтағы позицияның нығаюын, Home Credit Bank-пен бірігуден күтілетін синергияны, жоғары өтімділік пен капитал базасының жүйелі түрде артып келе жатқанын негізгі артықшылық ретінде көрсеткен. Банк алдағы уақытта да нарықтағы орнын күшейтіп, клиенттер, серіктестер және инвесторлар үшін ұзақ мерзімді құндылық қалыптастыруды жалғастыруды көздейді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
