Абай облысында экстракорпоралды ұрықтандыруға бөлінетін квоталарды тиімді пайдалану және репродуктивті денсаулық туралы ақпаратты кеңейту көзделіп отыр. Облыс әкімі Берік Уәли Қазақстандағы ЭКҰ әдісінің негізін қалаушы, профессор Салтанат Байқошқаровамен осы бағыттағы өзекті мәселелерді талқылады, – деп жазады Ertenmedia.kz.
Салтанат Байқошқарова биология ғылымдарының докторы, «NGC» халықаралық репродукция орталығы мен «ЭКОМЕД» клиникалар тобының ғылыми директоры. Кездесуде бедеулікті емдеу, репродуктивті денсаулықты қорғау және экстракорпоралды ұрықтандыру мүмкіндігін тұрғындарға қолжетімді ету жайы сөз болды. Негізгі назар мемлекет бөлген квоталарды толық әрі мақсатты игеруге аударылды.
Президент тапсырмасымен қабылданған «Аңсаған сәби» бағдарламасы аясында соңғы үш жылда Абай облысына жыл сайын 210 квота бөлініп келеді. 2026 жылдың алғашқы жартысында пайдаланылған квоталардың 65,4%-ы қала, 34,6%-ы ауыл тұрғындарына тиесілі болған. Ал алты ай ішінде биылға қарастырылған квоталардың 54%-ы игерілген.
Көрсеткіш ауыл тұрғындарының ЭКҰ бағдарламасына қатысу үлесі қала халқына қарағанда айтарлықтай төмен екенін аңғартады. Мұндай айырмашылық ақпараттың жеткіліксіздігіне, медициналық тексеріске қол жеткізу қиындығына немесе квота рәсімдеу тәртібін толық білмеуге байланысты болуы ықтимал. Сондықтан облыстың шалғай елді мекендеріндегі отбасыларға түсіндіру және кеңес беру жұмысын күшейту маңызды.
Берік Уәли денсаулық сақтау басқармасына осы бағыттағы жұмысты жандандыруды тапсырды. Тұрғындарға ЭКҰ мүмкіндігі, медициналық талаптар және квота алу тәртібі түсінікті түрде жеткізілуге тиіс. Ақпараттық жұмыстың нәтижесі бөлінген қаржының игерілуімен ғана емес, нақты көмек алған отбасы санымен өлшенбек.
Аймақ басшысы «Аңсаған сәби» бағдарламасының көптеген отбасыға үміт сыйлағанын атап өтті. Оның айтуынша, ұрпақ сүю әр шаңырақтың үлкен тілегі болғандықтан, облыс әкімдігі қажетті қолдауды жан-жақты көрсетуге дайын. Ол репродукция орталықтарымен жүйелі әріптестік орнатудың маңызын да айтты.
Салтанат Байқошқарова Абай облысындағы репродуктивті денсаулық мәселелерін шешуге және ЭКҰ бағыты бойынша кешенді қолдау көрсетуге дайын екенін жеткізді. Мамандандырылған орталық пен жергілікті денсаулық сақтау жүйесінің ынтымақтастығы диагностикадан емдеуге дейінгі жолды жеңілдетуі мүмкін. Ең бастысы, бөлінген квота қағаздағы мүмкіндік болып қалмай, сәби аңсаған әр отбасыға дер кезінде жетуге тиіс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
