Танымал қазақстандық кәсіпкер, продюсер Баян Алагөзованың жұбайы Тұрсын Алагөзов 57 жасқа толған туған күнін дүркіретіп атап өтті. Алматыда өткен сән-салтанатты кешке отандық шоу-бизнес өкілдері, кәсіпкерлер және ерлі-зайыптының жақын достары жиналды, деп хабарлайды Ertenmedia.kz.
Жұлдызды меймандар мен сахна төріндегі өнер иелері
Мерекелік шараға кіл өнер және медиа саласының жұлдыздары қатысты. Қонақтар қатарында белгілі тележүргізуші әрі кәсіпкер Динара Сәтжан, дизайнер Аида Кәуменова, танымал әншілер Ерке Есмахан мен Raim, сондай-ақ Айқын Төлепберген мен Жұлдыз Өмірғали бой көрсетті.
Кеш жүргізушілерінің бірі ретінде әйгілі стендап-комик Нұрлан Сабуров сахнаға шығып, жиналғандарға көтеріңкі көңіл-күй сыйлады. Ал музыкалық бағдарламаның басты хедлайнері аты аңызға айналған «А’Студио» тобы болды. Музыканттар кеш иесі мен меймандар үшін өздерінің танымал хиттерін орындады.
Бағалы тарту: таңбалы брошь және ретро автокөлік
Мереке иесіне жақындары есте қаларлық ерекше сыйлықтар тарту етті. Жұбайы Баян Алагөзова кәсіпкерге арнайы тапсырыспен жасалған зергерлік бұйым — ру таңбасы мен қар барысы бейнеленген бағалы алтын брошь сыйлады.
Ал продюсердің үлкен қызы Айсәуле Бақытбек пен күйеу баласы Әлішер Қайдар туған күн иесіне 1981 жылғы классикалық ретро Cadillac автокөлігін мінгізіп, күтпеген тосынсый жасады.
«Бақыт – дәл қазіргі сәт»
Кешке келген қонақтар әлеуметтік желідегі парақшаларында салтанатты кештен естеліктер бөлісіп, жүрекжарды құттықтауларын жариялады. Олардың қатарында тележүргізуші Динара Сәтжан кәсіпкерге ізгі тілегін арнады.
«Бақытты болу – бәрі қашан жақсы болады деп күтіп отыру емес. Бақыт бір кездері келетін нәрсе емес, дәл қазіргі сәт. Өзіңмен болып жатқан осы сәттен ләззат ала білу керек. Өмірді кейінге қалдырмай, дәл осы жерде әрі қазір өмір сүру маңызды», – деп жазды Динара Сәтжан.
Мерекелік кеште қонақтарға арнайы викториналар ұйымдастырылып, көңілді би кеші таңға дейін жалғасты.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
