Мысырдың Ұлттық су зерттеулері орталығының ғалымдары жылу электр станцияларының (ЖЭС) қызған суын теңіз суын тұщыландыру үшін пайдалануды ұсынды. Олардың есептеуінше, қазір теңізге босқа тасталып жатқан жылу энергияны жылыту мен айдауға артық шығындамай-ақ тұщы су алуға мүмкіндік береді, деп хабарлайды Ertenmedia.kz.
Болашақ қондырғының моделі қалай жұмыс істейді?
Идеяны тексеру үшін зерттеушілер болашақ қондырғының моделін әзірледі. Электр станциясының жанындағы аумақта олар жалпы ауданы 50 мың шаршы метрден асатын төрт блокты орналастырды, оған 12 505 күн тұщыландырғышын қоюға болады. Қызып тұрған суды пайдалану күн тұщыландыру жүйесінің өнімділігін бірден арттырмақ.
Әдетте мұндай қондырғылар тәулігіне 1 шаршы метрден 4-6 литр тұщы су өндіреді. Ғалымдар электр станциясынан бөлінетін қосымша жылу бұл көрсеткішті шамамен 7,5 литрге дейін жеткізеді деп күтуде. Нәтижесінде бүкіл жүйе тәулігіне шамамен 213 текше метр тұщы су бере алады.
Өндіріс құны мен экологиялық артықшылығы
Өндірістің есептелген құны 1 текше метр су үшін шамамен 66 центті құрады. Бұл кері осмос құнымен (65 цент) шамалас және көпсатылы буландыру бағасынан (1,2 доллар) екі есеге жуық арзан. Сонымен қатар, технология қоршаған ортаға тиетін кері әсерді азайта алады – бұл теңізге ыстық су жіберуді қысқартып қана қоймай, қондырғының отын жағу арқылы алынатын энергияны қажет етпейтіндігіне де байланысты.
Келесі кезең пилоттық қондырғы құру болмақ. Егер сынақтар ғалымдардың есебін растаса, мұндай жүйелерді жағалауда немесе ірі тұзды су қоймаларының маңында орналасқан басқа да жылу электр станцияларының қасына қоюға болады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
