Алматыда LEZ (Low Emission Zone) – ластаушы заттар шығарындыларының деңгейі төмен аймақ жобасының техникалық пилоты жалғасуда. Жоба көлік ағындарын, экологиялық жағдайды зерттеуге және келесі кезеңге көшу мүмкіндігі алдында аймақтың жұмыс істеу тетіктерін пысықтауға бағытталған, деп хабарлайды Ertenmedia.kz.
Жүйені тестілеу және деректерді талдау
Қазіргі кезеңде ақпараттық жүйелерді тестілеу, жабдықтардың дұрыс жұмыс істеуін тексеру және кіретін көліктер туралы деректерді талдау жүргізілуде. Сондай-ақ жүйенің барлық элементтерінің: автокөліктерді техникалық тексеру процедурасының, операторларға қойылатын талаптардың, деректерді беру процестерінің және жобаның барлық қатысушылары арасындағы өзара әрекеттестіктің жұмысқа қабілеттілігі мен тиімділігі тексерілуде.
Техникалық пилот кезеңінде көлік құралдарының қозғалысына шектеулер қолданылмайды. Сонымен қатар айыппұлдар салынбайды және LEZ аумағына кіру үшін ақы алынбайды.
Шектеулер қашан енгізілуі мүмкін?
Жауапкершілікті және қарастырылған барлық шектеулерді енгізу үшін қала әкімдігі шығарындылары төмен аймақтың шекараларын бекітуі қажет. Бұл 2027 жылдан ерте болмайды. Ықтимал шектеулердің нақты мерзімдері, шарттары мен параметрлері пилоттық кезеңнің қорытындысы бойынша айқындалады.
Аймақ шекарасы бекітілгенге дейін LEZ режимін бұзғаны үшін қандай да бір санкцияларды қолдануға заңды негіздер жоқ. Техникалық пилоттың нәтижелері бойынша ұсынылатын тетіктердің тиімділігі бағаланып, көлік жағдайы, экологиялық міндеттер және қала тұрғындарының мүдделері ескеріле отырып, одан әрі реттеу параметрлері айқындалатын болады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
