Жасанды интеллект нарығының көшбасшысы саналатын Nvidia компаниясының директорлар кеңесі 33 жыл бойы технологиялық алпауытты басқарып келе жатқан бас директор Дженсен Хуангтың болашағына қатысты шұғыл отырыс өткізді, деп хабарлайды Ertenmedia.kz.
Шетелдік БАҚ-тың дереккөздеріне сүйенсек, корпорация басшылығының шұғыл бас қосуына жаңа жанжал себеп болды. The New York Times басылымы Хуангтың компания вице-президенті Кимберли Пауэллмен де жеке қарым-қатынаста болғанын жариялады. Осы ақпарат шыққаннан кейін The Wall Street Journal директорлар кеңесі Дженсен Хуангты қызметінен босату мүмкіндігін қарастырып жатқанын хабарлады. Жаңалық аясында Nvidia акциялары сауда-саттықтан кейінгі сессияда 8,5 пайыздан астам арзандап кетті.
Шпиондық жанжал және жеке өмір дауы
Бұған дейін апта басында компания кеңесі америкалық билік органдарының алаңдаушылығынан соң тәуелсіз тергеу басталғанын жариялаған еді. АҚШ барлау қызметі қытай тыңшысы деп күдіктенген Сингапурдегі Megaspeed фирмасының бұрынғы жетекшісі Элис Хуангпен бас директордың жақын байланысы болғаны анықталған. Деректерге сәйкес, тергеушілер бұл қарым-қатынас қытайлық тараптың құпия технологияларға қол жеткізуіне жол ашты ма деген мәселені тексере бастаған.
Дженсен Хуанг жексенбі күні ұжымға хат жолдап, жұбайы мен отбасының алдында адалдықты бұзғанын мойындап, кешірім сұрады.
«Мен жасаған ісім мен келтірген зардабым үшін толық жауапкершілікті өз мойныма аламын», – деді Дженсен Хуанг қызметкерлерге жазған хатында.
Компания дауды зерттеу үшін танымал Wachtell, Lipton, Rosen & Katz заң фирмасын тартты. Алғашқы мәлімдемелерде директорлар кеңесі мемлекеттік қауіпсіздік пен корпоративтік құпиялардың жария болғанына еш дәлел таппағанын айтқан еді. Дегенмен компания ішіндегі бағынышты әріптесімен байланысы туралы жаңа дерек жағдайды одан сайын ушықтырып жіберді.
Мұрагерлік жоспардың болмауы инвесторларды алаңдатты
Нарық сарапшылары бас директордың ықтимал кетуі жасанды интеллект саласын дүр сілкіндіруі мүмкін деп есептейді. 4 триллион доллардан астам капитализациясы бар алпауыттың тағдыры негізін қалаушының есімімен тығыз байланысты. Хуанг осы уақытқа дейін компанияда екінші адамды тағайындаудан немесе ресми мұрагерлік жоспар бекітуден саналы түрде бас тартып келген.
«Біздің компания мен оны қалай жүргізу керектігін білетіндей етіп құрылған. Сондықтан оны өзім басқарып отырғанша, маңыздысы да тек осы», – деген еді бас директор бұған дейінгі сұхбаттарының бірінде.
Енді директорлар кеңесі екі таңдаудың алдында тұр: не Хуангты уақытша шеттетіп, мұрагер іздеуді бастайды, не оны дереу қызметінен босатады. Уолл-стрит инвесторлары кремний алқабының ең ықпалды көшбасшыларының бірінен айырылу бүкіл технологиялық сектордың өсіміне соққы бола ма деген қауіппен оқиға барысын бақылап отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
