Әлемге танымал «Masala y Maíz» мейрамханасының негізін қалаушылар, Мишлен жұлдызының иегерлері Норма Листман мен Сәкіб Кэвал америкалық Food & Wine басылымына көлемді сұхбат беріп, өздері білікті шеф-аспаз бола тұра, үйіне тамақ әзірлейтін көмекші жалдау себебін түсіндірді, деп хабарлайды Ertenmedia.kz.
Кәсіби шеберлік пен тұрмыстық күйзеліс
Мехико қаласында орналасқан танымал мекемені басқаратын ерлі-зайыпты гастрономия саласындағы әсіре жұмысбастылық адамның жеке өміріне қалай әсер ететінін бүкпесіз баяндады. Олардың айтуынша, күні бойы жоғары деңгейлі асүйде күрделі мәзір дайындаумен айналысатын шеберлердің кешкісін өз отбасына ыстық тамақ пісіруге физикалық та, моральдық та шамасы қалмайды.
Балалы болғаннан кейін жағдай тіпті қиындап, ерлі-зайыпты бірнеше ай бойы кофе мен кесадильямен ғана күнелтуге мәжбүр болған. Осыдан кейін олар өмір сүру сапасын сақтау және отбасылық берекені нығайту мақсатында үйге арнайы аспаз шақыруды ұйғарған.
«Өзгелерге ас әзірлеп жүріп, өзіңді ұмытып кету оңай. Үйде тамақ пісіруден бас тарту – өз денсаулығымыз бен отбасымызды күйзелістен қорғаудың жалғыз амалы болды», – деп түсіндірді аспаздар.
«Фьюжн» емес, ортақ тарих: «Mestizaje» пәлсапасы
Норма Листман мен Сәкіб Кэвал тек аспаз ғана емес, сонымен бірге тағам тарихы мен миграцияны зерттейтін белсенділер ретінде белгілі. Олардың мейрамханасы Мексика, Үндістан және Шығыс Африканың дәмдерін біріктіреді. Алайда олар өз тағамдарын жай ғана «фьюжн» деп атағанды құптамайды, тіпті мекеме мәзіріне «біз фьюжн емеспіз» деген жазу енгізген.
Олардың көзқарасынша, бірнеше құрлықтың дәмдері отарлау мен халықтардың көші-қоны барысында табиғи түрде тоғысқан. Мәселен, солтүстікүнділік дәмдеуіштермен маринадталған қой еті мен мексикалық дәстүрлі барбакоа әдісі бір табақта табиғи үйлесім табады.
Мейрамхана қызметкерлеріне арналған әділ талаптар
Жұбайлар қоғамдық тамақтану индустриясындағы қатал еңбек жағдайын өзгертуді басты ұстанымға айналдырған. Олар асүй қызметкерлері де ірі технологиялық компаниялардың мамандары сияқты әлеуметтік кепілдіктерге, қалыпты демалыс пен лайықты жалақыға ие болуы керек деп есептейді.
Сол себепті «Masala y Maíz» мейрамханасы кешкі сағат алтыда жұмысын аяқтайды. Бұл шешім қызметкерлердің отбасына уақыт бөлуіне және созылмалы шаршаудан арылуына мүмкіндік береді.
«Қалтаңа қарай төле»: Жаһандық сенім акциясы
Аспаптық шеберлікпен қоса, бұл жұп «Қалтаңа қарай төле» (Pay What You Can) атты халықаралық бастаманың бастауында тұр. Алғашында қымбатшылық пен дағдарыс кезінде жергілікті тұрғындарға қолдау ретінде ұйымдастырылған бір күндік шара қазір ондаған елдегі жүзден астам мейрамхананы біріктіретін ауқымды қозғалысқа ұласты.
Сәкіб Кэвал бұл акция тұтынушы мен мейрамхана арасындағы екіжақты сенімнің көрінісі екенін айтады.
«Бұл өзара үлкен сенім актісіне айналады. Біз қонақтардың мүмкіндігіне қарай төлейтініне сенсек, олар біздің тағам сапасын төмендетпейтінімізге сенеді», – деді Сәкіб Кэвал.
Әйгілі аспаздардың айтуынша, мейрамхана ісі тек табыс табудың құралы ғана емес, адамдарды жақындастыратын, еңбек құқығы мен шынайы қамқорлықты дәріптейтін мәдени орта болуы шарт.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
