Абай облысының әкімі Берік Уәли Құрылтай депутаттарының сайлауына қатысып, өз таңдауын жасады. Өңір басшысы Семей медицина университеті ғимаратында орналасқан №93 сайлау учаскесінде дауыс берді, – деп жазады Ertenmedia.kz.
Берік Уәли бүгінгі сайлауды елдің қоғамдық-саяси өміріндегі маңызды кезеңдердің бірі деп бағалады. Оның айтуынша, азаматтардың өз таңдауын білдіруі ел болашағына қатысты шешімдерге қатысудың негізгі тетіктерінің бірі саналады.
«Бүгін – еліміздің қоғамдық-саяси өміріндегі маңызды күн. Құрылтай депутаттарын сайлау – азаматтардың өз таңдауын білдіріп, ел болашағына қатысты шешімдер қабылдауға қатысуының маңызды мүмкіндігі», – деді облыс әкімі.
Өңір басшысы Абай облысында дауыс беруге қажетті барлық жағдай жасалғанын атап өтті. Оның пікірінше, басты міндет – сайлау үдерісінің ашық, ұйымдасқан және заң талаптарына сай өтуін қамтамасыз ету.
– Өңір тұрғындары елдік мәселелерге әрдайым жауапкершілікпен қарайды. Бүгін де жерлестеріміз азаматтық белсенділік танытып, өз таңдауын жасайды деп сенемін, – деді Берік Уәли.
Абай облысында сайлаушылар тізіміне 402 408 азамат енгізілген. Өңірде барлығы 464 сайлау учаскесі жұмыс істеп тұр. Оның 429-ы ашық, 35-і жабық учаске.
Құрылтай депутаттарының сайлауын ұйымдастыруға 477 сайлау комиссиясы жұмылдырылған. Оның құрамына бір облыстық, 12 аумақтық және 464 учаскелік комиссия кіреді.
Комиссияларда 3 261 адам жұмыс істейді. Олардың басым бөлігінің бұған дейінгі сайлау науқандарын ұйымдастыру тәжірибесі бар.
Барлық сайлау учаскесі қажетті материалдық-техникалық құралдармен толық жабдықталған. Ерекше қажеттілігі бар азаматтардың дауыс беруіне қолайлы жағдай жасауға да жеке назар аударылған.
Өңірдегі 458 сайлау учаскесі ғимараттардың бірінші қабатында орналасқан. Барлық 429 ашық учаске пандустармен қамтамасыз етілсе, 397 учаскеде тактильді көрсеткіштер орнатылған.
Абай облысындағы сайлау учаскелерінде дауыс беру белгіленген тәртіппен жалғасып жатыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
