Жетісу облысы Ескелді ауданындағы Ақтұмаға заманауи ауыз су құбыры жүргізілді, деп жазады Ertenmedia.kz.
Жүзден астам тұрғыны бар елді мекенде бұған дейін ауыз судың негізгі көзі ескірген ұңғыма болған. Су ауыл ішіндегі көшелік құдықтар арқылы беріліп келген. Оның сапасы мен қысымы да тұрғындардың талабына толық сай болмаған.
Мәселені ескі құбырларды жамау арқылы шешу мүмкін болмағандықтан, ауыл көшелерінің бойымен сервистік желілер тартып, жаңа су құбырын салу туралы шешім қабылданды. Жоба 2021 жылы басталғанымен, мердігердің жауапсыздығына байланысты жұмыс ұзаққа созылған. Кейін облыс басшылығы араласып, құрылыс өткен жылы толық аяқталды.
Қазіргі таңда Ақтұма ауылындағы 37 үйдің 35-і орталықтандырылған ауыз су жүйесіне қосылды. Бұл тұрғындар үшін күнделікті тұрмыс сапасын жақсартатын маңызды өзгеріс. Әсіресе ауылда таза судың тұрақты берілуі денсаулық, санитарлық жағдай және үй шаруашылығы үшін ерекше мәнге ие.
Осындай құрылыс жұмыстары Ескелді ауданындағы тағы бір елді мекен – 1,8 мыңнан астам тұрғыны бар Сырымбет ауылында да аяқталды. Жалпы аудандағы 33 елді мекеннің 32-сі орталықтандырылған ауыз су жүйесіне қосылған. Бұл аудан бойынша қамту деңгейі 99,9 пайызға жеткенін көрсетеді. Ал шамамен 30 адам тұратын бір ауылда орталықтандырылмаған су жүйесі пайдаланылып отыр.
Жетісу облысы бойынша қазіргі таңда 329 елді мекен орталықтандырылған ауыз сумен қамтылған. Халық саны бойынша таза ауыз суға қол жеткізу деңгейі 99,9 пайызды құрайды.
Ауылға сапалы ауыз су тарту – жай инфрақұрылымдық жоба ғана емес. Ол тұрғындардың өмір сапасын көтеріп, елді мекеннің болашағына сенім береді. Ақтұма мен Сырымбеттегі жұмыстар өңірде әлеуметтік инфрақұрылымды жаңарту ісі жүйелі түрде жалғасып жатқанын көрсетеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
