Алматы қаласында 28 қыркүйек күні таңертең бірнеше сағат аралығымен екі мәрте жерасты дүмпуі тіркеліп, жергілікті тұрғындар тербелісті анық сезді, деп хабарлайды Ertenmedia.kz.
Алғашқы жерасты сілкінісі таңғы сағат 06:32 шамасында байқалған еді. Қаланың бірқатар ауданы мен көпқабатты үйлердің тұрғындары әлеуметтік желілерде кенеттен шыққан гүріл мен қысқа дірілден оянғандарын жарыса жазды. Арада шамамен үш сағат өткенде, сағат 09:37 кезінде қалада әлдеқайда қаттырақ сезілген екінші тербеліс орын алды.
Таңғы тыныштықты бұзған дүмпу
Сейсмологиялық бақылаулар мен зерттеулердің ұлттық ғылыми орталығы таңғы сағат 06:32-де еліміздің аумағында сейсмикалық оқиға тіркелгенін растаған.
Төтенше жағдайлар департаменті алғашқы дүмпу кезінде мегаполисте тербеліс ресми түрде сезілмегенін, шұғыл қызмет нөмірлеріне қираулар мен зардап шеккендер бойынша шағым түспегенін мәлімдеді.
Дегенмен қаланың батыс бөлігі мен бірқатар шағынауданының тұрғындары жер астынан шыққан дыбыс пен тербелісті анық аңғарғандарын айтып, әлеуметтік желілерде белсенді бөлісті.
Сағат 09:37-де қайталанған сілкініс
Көп ұзамай сағат 09:37 шамасында мегаполис аумағында қайтадан жерасты дүмпуі қайталанды. Екінші тербеліс алғашқысына қарағанда айтарлықтай қатты сезілген. Әсіресе биік ғимараттар мен тұрғын үй кешендерінің жоғарғы қабаттарында аспалы шамдар шайқалып, тұрмыстық заттардың қозғалғаны байқалды.
Қазіргі уақытта сейсмолог мамандар мен тиісті қызметтер жерасты дүмпуінің нақты эпицентрін, магнитудасын және сезілу балын есептеп жатыр. Мамандар қала тұрғындарын байбалам салмауға, сабырлық сақтап, тек ресми хабарламаларға сүйенуге шақырады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
