Жұмабек Тәшеновтің Қазақстанның аумақтық тұтастығына қатысты тарихи рөлін тереңірек зерттеу қажет. Сарапшы Эльдар Қонаев 1956 жылғы оқиғаларға назар аударып, мемлекет қайраткерінің жер мәселесіндегі қызметіне қатысты пікір білдірді, деп хабарлайды Ertenmedia.kz.
1956 жылғы шешім және Бостандық ауданы
Эльдар Қонаевтің айтуынша, 1956 жылы Қазақстан аумағының бір бөлігі, соның ішінде Бостандық ауданы Өзбекстан құрамына өткен. Ол Тәшеновті тек қазақ жерін қорғаған қайраткер ретінде біржақты көрсету сол кезеңдегі күрделі оқиғалардың мәнін толық ашпайды деп санайды.
Сарапшы сол кезде Тәшенов Қазақ КСР Жоғарғы Кеңесі Президиумының төрағасы қызметін атқарғанын және аумақтық құрылым мәселелерін зерттеген бастамашыл топты басқарғанын еске салды.
«Мифтік қаһарман» бейнесіне сын
Қонаев мемлекет қайраткерінің төңірегінде қалыптасқан түсінік пен тарихи шындықтың аражігін ашу қажеттігін мәлімдеді.
«Тәшенов және бүгінгі күні одан жасап алған бейне – мифтік қаһарман. 1956 жылы оның өзі Қазақстан аумағын аралап шыққан бастамашыл топты басқарды. Сол кезде Бостандық ауданының 500 мың шаршы шақырымдық шөлейт жері де қаралған. Дәл оның ұсынысымен бұл аумақ Өзбекстанға берілді. 1956 жылы ол Жоғарғы Кеңес Президиумының төрағасы болған кезде осындай шешім қабылданды. Жер берілді, содан бері әлі қайтарылған жоқ», – деді Эльдар Қонаев.
Тарихи тұлғаны жан-жақты бағалау
Сарапшының пайымдауынша, Тәшеновтің тарихи рөлін бағалаған кезде оның беделін нығайтқан істерімен бірге, сұрақ тудыратын шешімдерін де ескеру қажет.
Оның пікірінше, кез келген тарихи қайраткердің шынайы бейнесі өткен оқиғаларды жан-жақты зерттеу негізінде ғана қалыптасуға тиіс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
