Әзербайжан Ақтау маңында құлаған Azerbaijan Airlines (AZAL) әуекомпаниясының жолаушы ұшағы апатына байланысты Ресейді халықаралық сотқа беруге «дайындалып жатыр», деп жазады Ertenmedia.kz.
Бұл туралы Әзербайжанның «АПА» ақпарат агенттігі хабарлады. Мәліметке қарағанда, Баку «фактілер мен айғақтар жинап жатыр», — деп хабарлайды «Азаттыққа» сілтеп.
Басылым мәліметінше, Әзербайжан билігі Қазақстанның көлік министрлігі ұшақ апаты жайлы алдын ала есепті жарияланғаннан кейін де Ресей тарапының оқиғаға «біржақты пікір беруді» жалғастырып жатқанына наразы.
«Баку» ресейлік шенеуніктер, сарапшылар мен бұқаралық ақпарат құралдары оқиғаға (Ресейдің) қатысы бар екенін жоққа шығаруды жалғастырып, кінәні экипаждың мойнына ілгісі келіп отыр» деп есептейді. Биліктің пікірінше, Ресейдің мұндай тактикасы 2014 жылы ресейлік «Бук» зенит-зымыран кешені Донбасс аспанында атып құлатқан малайзиялық Boeing 777 жолаушы ұшағы апатын еске түсіреді», — деп жазылған мәліметте.
«Әзербайжан шарттары мен талаптарын жоғары деңгейде көрсетті», – делінген ақпаратта. Баку «Ресеймен диалогқа есік ашық» деді: «Мәскеу кінәсін ашық мойындап, жауапкершілікті мойнына алуы керек. Әйтпесе, Баку келесі қадамдарға баруға дайын».
Айта кетейік, Azerbaijan Airlines әуекомпаниясының Embraer ERJ 190-100 жолаушы ұшағы былтыр 25 желтоқсанда Қазақстанның Ақтау қаласы маңына құлады. Апат салдарынан қаза тапқан 38 адамның алтауы – Қазақстанның, 25 адам – Әзербайжанның, жетеуі — Ресей азаматтары.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
