Әлеуметтік желілерде сопылық зікіршілер қауымдастығының жетекшісі ретінде танылған Исматулла Мақсұмға қатысты жасөспірімдерге жыныстық сипатта қысым көрсетті деген ауыр айыптаулар тараған соң, Қазақстан мұсылмандары діни басқармасы ресми мәлімдеме жасады. Мүфтият аталған тұлғаның елдегі ресми діни құрылымға ешқандай қатысы жоқ екенін және исламда зорлық-зомбылықтың кез келген түрі ауыр күнә саналатынын қадап айтты, деп хабарлайды Ertenmedia.kz.
«Діни басқармаға қатысы жоқ»: ҚМДБ-ның ұстанымы
Діни басқарма соңғы күндері интернет кеңістігінде үлкен қоғамдық дүрбелең туғызған бейнежазбаларға байланысты үн қатып, аталған қауымдастықтың еліміздегі ресми мешіттер мен медреселерге еш қатысы жоқ екенін нақтылады. Мүфтият өкілдері өзгенің құқығына қол сұғу мен мәжбүрлеу әрекеттерінің шариғат талаптарына түбегейлі қайшы келетінін ескертті.
«Исматулла Мақсұм және оны қолдаушылардың Қазақстан мұсылмандары діни басқармасына ешқандай қатысы жоқ екендігін мәлімдейміз. Олардың әрекеттері мен діни ұстанымдары Діни басқарманың ұстанымымен сәйкес келмейді. Дінімізде адам баласына зорлық-зомбылық жасау, қорқыту, біреудің ақысына қол сұғу, адамды мәжбүрлеу ауыр күнә саналады. Халықты дін атын жамылып, өзінің ғана діни ұстанымын дұрыс санап, адамды өзіне тәуелді етуге және соқыр сенімге үндейтін кез келген ортадан сақ болуға шақырамыз», – деп мәлімдеді ҚМДБ.
Сондай-ақ Мәдениет және ақпарат министрлігіне қарасты Дін істері комитеті де Исматулла Мақсұмның еліміздегі ресми тоғыз медресе-колледждің жұмысына еш қатысы жоқ екенін ресми растады.
Ясауи мұрасы және рухани жауапкершілік
Діни басқарма Қожа Ахмет Ясауидің рухани мұрасын жеке топтардың бұрмалап пайдалануына жол берілмейтінін баса айтты. Ұлы ойшылдың ілімі – тұтас қазақ халқының сан ғасырлық асыл қазынасы, сондықтан оны белгілі бір жабық жамағаттардың жеке мүддесіне бейімдеп, теріс мақсатта қолдануына қатаң тосқауыл қойылуы тиіс.
Мүфтият соқыр сенім мен жеке басқа табынушылықтың кез келген адамның санасын улап, рухани тәуелділікке түсіретінін еске салып, азаматтарды күмәнді діни орталардан аулақ болуға шақырды.
Ашық айыптаулар және полицияның тергеуі
Даудың туындауына журналист Жанар Байсеміз бен белсенді Абзал Достияровтың интернет арналарында жарияланған сұхбаттар түрткі болды. Аталған қауымдастықтың бұрынғы мүшесі Ақылбек Жұмабеков пен өзге де шәкірттер Исматулла Мақсұмның жабық ортада кәмелетке толмаған балаларға жыныстық қысым көрсеткенін, тіпті 20-дан астам жасөспірімнің жәбір көргенін жария етті. Олардың айтуынша, діни жетекші балаларды түрмемен және қарғыспен қорқытып, болған жайтты құпия сақтауға мәжбүрлеген.
Қоғамдық резонанстан кейін Ішкі істер министрлігі іске араласты. Құқық қорғау органдары жарияланған деректер бойынша сотқа дейінгі тергеп-тексеру басталғанын, барлық мән-жайлар толық тексерілетінін хабарлады.
Исматулла Әбдіғаппар 2011 жылы діни экстремизм, қылмыстық топ құру және заңсыз медициналық қызметпен айналысқаны үшін 14 жылға сотталып, кейін бостандыққа шыққан болатын.
Дінді жамылған озбырлық қоғамды ірітеді
Бұл оқиға еліміздегі жабық діни ұйымдар мен бейресми жамағаттардың бақылаусыз қызметі қаншалықты қауіпті екенін көрсетті. Дінді, тақуалықты немесе рухани ілімді жамылып жүргізілетін заңсыздықтар ең алдымен қоғамның жігін ашып, адамдар арасындағы сенімді талқандайды.
Әсіресе қорғансыз жасөспірімдердің құқығы тапталып, рухани ұстаз бейнесіндегі адамдардың сорақы қылмыстарға баруы туралы ақпарат құқық қорғау органдарынан ең жоғары деңгейдегі әділдікті талап етеді. Ешқандай діни мәртебе немесе өткен күнгі танымалдылық заң алдындағы жауапкершіліктен құтқармауы тиіс.
Полиция бұл істі аса мұқият, жариялы әрі заң аясында аяғына дейін тергеп, жәбір көргендердің құқығын қорғауы шарт. Діни ортадағы кез келген жазасыздық пен соқыр сенім мемлекеттің рухани және құқықтық қауіпсіздігіне тікелей қатер төндіреді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
