Қапшағай су қоймасы 2027 жылдан бастап су-мотор спортының әлемдік орталықтарының біріне айналмақ. Алматы облысында F1H2O чемпионатын бес жыл өткізу жоспарланып, жарыспен қатар пилоттар академиясын, спорт катерлері өндірісін және Қазақстанның ұлттық командасын қалыптастыру көзделіп отыр, – деп жазады Ertenmedia.kz.
Алматы облысының әкімі Марат Сұлтанғазиев H2O Racing өкілдерімен кездесіп, халықаралық доданы Қонаевта ұйымдастыруға дайындықты талқылады. Бұған дейін F1H2O ұйымы, iHolding компаниясы, Сауд Арабиясының ресми делегациясы және облыс әкімдігі 2027 жылы Қапшағай су қоймасында әлем чемпионатының кезеңін өткізу жөніндегі келісімге қол қойған. Жобаны кейінгі бес жыл бойы жалғастыру мүмкіндігі де қарастырылған.
– F1H2O деңгейіндегі халықаралық жарыс Қазақстанның әлемдік беделін күшейтіп, өңірдің туристік және экономикалық әлеуетін арттырады. Облыс әкімдігі бастамаға толық қолдау көрсетеді, – деді Марат Сұлтанғазиев.
Жоба бір реттік спорт мерекесімен шектелмейді. H2O Racing өкілі Раймондо ди Сан Джермано Қонаевта су көлігін басқаратын пилоттарды даярлайтын академия ашу жоспары бар екенін айтты. Мұнда спортшылармен қатар техникалық мамандар да оқытылады. Қазақстанда және Орталық Азияда су-мотор спорты федерациясын дамыту көзделген.
– Алдағы 12 айда Қазақстанның толыққанды ұлттық командасын жасақтауға болады. Сонымен бірге спорт катерлерін шығаратын зауыт ашуды жоспарлап отырмыз. Негізгі жобалардың барлығы Қонаевта жүзеге асады, – деді Раймондо ди Сан Джермано.
F1H2O — өте жоғары жылдамдықпен қозғалатын арнайы спорт катерлерінің жарысы. Чемпионат күрделі техникалық дайындықты, кәсіби пилоттарды және су айдынына бейімделген инфрақұрылымды талап етеді. Орталық Азиядағы алғашқы ресми кезең 2026 жылы Ыстықкөлде өтті. Ұйымдастырушылар сол жарыс кезінде Қазақстанның 2027 жылғы күнтізбеге қосылатынын жариялады.
Қапшағай су қоймасының таңдалуы Қонаевтың су туризміне бейім географиясымен байланысты. Жарыс мыңдаған шетелдік қонақты тартуға, қонақүй, қоғамдық тамақтану, көлік және сервистік бизнестің табысын арттыруға мүмкіндік береді. Тікелей трансляцияны әлем бойынша миллиардқа жуық көрермен тамашалайды деген болжам бар.
Ең маңыздысы — халықаралық брендтің артынан өңірде жаңа индустрия қалыптасуы мүмкін. Академия маман даярласа, катер зауыты өндірістік құзырет пен жұмыс орнын әкеледі. Ұлттық команда Қазақстанды судағы әлем чемпионатында тұрақты таныстырады. Осылайша Қапшағайдағы F1H2O жарысы туристік шоу ғана емес, спорт, технология және өндірісті біріктіретін ұзақ мерзімді жобаға айналмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
