Жуырда Грекия аралында өрт шыққан еді. «Персефон I» яхтасына қатысты оқиғадан кейін тың деректер шықты. Бұл туралы iEidiseis грек басылымы жазды, — деп хабарлайды ErtenMedia.kz.
Басылым мәліметінше, Идра аралында өрт басталғаннан кейінгі алғашқы сағаттарда жергілікті төтенше жағдайлар қызметі бірнеше қате жіберген. Соның ішінде оқиғаға қатысы болуы мүмкін қазақстандықтар Грекиядан шығып кете алды. Идра аралына жататын әкімшілік аумақ — Пирей полициясы жүргізген қосымша тергеуден кейін қателер анықталған.
Бірінші қатені жағалау күзетінің өкілдері жіберді. Олардың бірінің айтуынша, «Персефон I» яхтасын ұстамау туралы бұйрық алған. Екінші қатені өртке қарсы күрес басқармасының қызметкері жіберген.
«Ол яхтаның жолаушыларымен сөйлесіп, тіпті олардың өртке қатысы бар-жоғын сұрағанын айтты. Қызметкер олардың мұны жоққа шығарған жауабына қанағаттанған», — деп жазды басылым.
Үшінші қатені өрт сөндіру бөлімінің қызметкерлері жіберген, олар портқа келгенде «Персефон I» яхтасының жолаушыларымен тілдескен.
«Айғақтарда қазақстандықтардан тек ауызша жауап алынғаны расталады. Екіншіден, олардың рейске кешігіп бара жатқаны куәгер ретінде куәлік бергенге және ұялы телефондарын тексергенге дейін елден кетуге мүмкіндік беру үшін жеткілікті болған», — делінген басылымда.
Сонымен қатар, өрт сөндіру қызметі офицерлерінің бірінің айғақтарының үзіндісі келтірілген.
«Олар түтіннің қатты иісінен өртті байқаған сәтте яхта салонында болғанын және футболдан Еуропа чемпионатының матчын көргенін айтты. «Яхтада зымырандар пайдаланылған ойын-сауық шарасы болды ма?» деген сұраққа олар «жоқ» деп жауап берді. Сондай-ақ, олар яхтаға мінген сәттен бастап өрт туралы білгенге дейін яхтадан көмекші қайықпен жағаға шықпағанын айтты», — деп келтірді iEidiseis басылымы өрт сөндіру офицерінің айғақтарын.
Осылайша, Грекия аумағында»Персефон I» жолаушыларынан бір рет жауап алынған. Кейін олар шұғыл түрде Қазақстанға ұшып кетті.
Айта кетейік, Грекияның Идра аралындағы орман өрті 21 маусымда болған еді. Оның болжалды себебі — жағалауда болған «Персефон» яхтасынан отшашу атылуы. Бұл оқиға бойынша БАҚ беттерінде сегіз қазақстандық күдікті екені жазылды. OCCRP жариялаған тізімге сәйкес олардың ішінде кәсіпкер Данияр Әбілғазин мен Halyk Bank басшысы Үміт Шаяхметова бар. Алайда артынша Әбілғазин бәрін жоққа шығарып, арты қайғылы жайтқа ұласатын қадамдарға бармағанын айтты.
