Ақордада Азаматтық мәселелері жөніндегі комиссияның кезекті отырысы өтіп, Мемлекет басшысына 255 адамды ел азаматтығына қабылдау туралы ұсыныс енгізілді, деп хабарлайды Ertenmedia.kz.
Комиссия отырысына жетекшілік еткен вице-президент Ерлан Қарин жиында ел азаматтығын алу және одан шығу жөніндегі түскен өтініштердің жан-жақты сараланғанын жеткізді. Отырыс барысында 43 азаматтың ел азаматтығынан бас тарту туралы өтінішін қанағаттандыру жөнінде шешім қабылданды.
Азаматтықтан бас тарту өтініштері 40 есе азайған
Жиын барысында елімізде азаматтықтан шығуға ниет білдірушілердің қатары кейінгі жылдары айтарлықтай сирегені атап өтілді. Ресми статистикаға сүйенсек, кейінгі 8 жылда азаматтықтан шығуға берілген өтініштердің саны шамамен 40 есеге дейін қысқарған. Аталған көрсеткіш тұрғындардың болашаққа деген нық сенімі мен ел ішіндегі әлеуметтік оптимизмнің айқын белгісі ретінде бағаланды.
Көк төлқұжаттың халықаралық салмағы
Жиында көгілдір түсті қазақстандық төлқұжаттың жаһандық және аймақтық аренадағы салмағы артқаны айтылды. Түрлі халықаралық индекстердің бағалауынша, Қазақстан паспорты өңірдегі ең ықпалды әрі сенімді құжаттардың бірі саналады. Қазіргі уақытта еліміздің азаматтары әлемнің 80-ге жуық мемлекетіне визасыз немесе жеңілдетілген тәртіппен еркін сапарлай алады.
Ерлан Қарин паспорт беделі мен елдің тартымдылығы жайлы пікірін білдірді.
«Президент Қасым-Жомарт Тоқаев атап өткендей, біздің паспорттың салмағы жыл сайын артып келеді, бұл еліміздің тартымдылығының өсіп келе жатқанын білдіреді. Түрлі индекстердің дерегінше, қазақстандық көгілдір паспорт өңірдегі ең мықты паспорт саналады, ал азаматтарымыз әлемнің 80-ге жуық еліне визасыз бара алады», – деді Ерлан Қарин.
Шетелдік мамандар мен инвесторлардың қызығушылығы
Қазақстан азаматтығын алуға қызығушылық шетелдік білікті мамандар арасында да байқалады. Соңғы жылдары отандық азаматтық институты IT саласының өкілдері, инвесторлар, кәсіпкерлер және ғылым мен мәдениет қайраткерлері үшін ерекше тартымды бола бастады.
Вице-президенттің айтуынша, бұл жетістіктер жүйелі реформалар мен халықаралық беделдің артуының тікелей жемісі.
«Еліміздің азаматтығы беделінің артуы – президенттің әлеуметтік-экономикалық және қоғамдық-саяси салалардағы реформаларын жүзеге асырудың нәтижесі, сондай-ақ Мемлекет басшысы жүргізіп отырған халықаралық ынтымақтастық саясатының жемісі», – деп атап өтті вице-президент.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
