Маңғыстауда бекіре тұқымдас балық өсіріп, қара уылдырық өндіретін жоғары технологиялы кешеннің құрылысы басталды, деп жазады Ertenmedia.kz.
30 сәуір күні Түпқараған ауданына қарасты Қызылөзен ауылында стратегиялық маңызы бар инвестициялық жобаның іргетасын қалау рәсімі өтті. Жобаны «RED PEARL» балық фермасы» ЖШС жүзеге асырады. Аталған бастама Маңғыстау үшін шикізаттық сектордан бөлек жаңа өндіріс бағытын дамытуға жол ашатын маңызды қадам саналады.
Іс-шараға Маңғыстау облысының әкімі Нұрдәулет Қилыбай, ҚР Ауыл шаруашылығы министрлігі Балық шаруашылығы комитеті төрағасының орынбасары Бауыржан Жұмажанұлы, «Red Pearl» балық фермасының құрылтайшысы Рей-де Руддер Кристиан Эдвин, өңір ардагерлері мен қоғам өкілдері қатысты.
Жоба балық шаруашылығын дамытуға, өңір экономикасын әртараптандыруға және Маңғыстаудың инвестициялық тартымдылығын күшейтуге бағытталған. Оны іске асыруға «Swiss Choice Holding» швейцариялық компаниясы қатысып отыр. Қаржыландыру толықтай жеке инвестиция есебінен жүргізіледі.
Жоспар бойынша Қызылөзенде жылына 100 тоннаға дейін бекіре тұқымдас балық өңдеп, 10 тоннаға дейін қара уылдырық өндіруге мүмкіндік беретін заманауи кешен салынады. Кәсіпорында аквакультура саласындағы озық халықаралық технологиялар енгізіліп, бекіре тұқымдас балықтың бірнеше түрін өсіру көзделген.
Маңғыстау үшін мұндай өндірістің мәні бөлек. Өңір экономикасы ұзақ жылдар бойы мұнай, газ, көлік-логистика және теңіз инфрақұрылымына сүйеніп келді. Енді балық шаруашылығы секілді жоғары қосылған құн қалыптастыратын салаға жеке инвестиция тарту жергілікті экономиканың құрылымын кеңейте түседі. Әсіресе экспорттық әлеуеті жоғары қара уылдырық өндірісі Каспий өңіріндегі жаңа нарықтық мүмкіндік ретінде қарастырылып отыр.
«Қара маржан» қайта оралды
Салтанатты рәсімде облыс әкімі Нұрдәулет Қилыбай жобаның өңірдің әлеуметтік-экономикалық дамуына серпін беретінін атап өтті. Оның айтуынша, аталған кешен Мемлекет басшысы Қасым-Жомарт Тоқаевтың экономиканы әртараптандыру, шикізаттық емес секторды дамыту және инвестиция тарту жөніндегі тапсырмасымен үндеседі.
Облыс басшысы жоба бұған дейін инвестор тарапынан Мемлекет басшысына таныстырылып, қолдау тапқанын жеткізді. Енді сол бастама нақты іске асып жатыр. Жаңа кешен озық технология енгізуге, бәсекеге қабілетті өндіріс қалыптастыруға және экспорттық әлеуетті арттыруға мүмкіндік береді.
Нұрдәулет Қилыбайдың сөзінше, кәсіпорын іске қосылғаннан кейін жаңа жұмыс орындары ашылып, азық-түлік қауіпсіздігі күшейеді, жергілікті бюджетке түсетін салық көлемі артады. Сонымен қатар жоба Қазақстанның Каспий маңындағы инвестициялық беделін нығайтуға ықпал етеді.
Кешен кезең-кезеңімен іске қосылады. Алғашқы кезеңде кемінде 40 жаңа жұмыс орнын ашу жоспарланған. Кейін өндіріс толық қуатына шыққан сайын оның айналасындағы инфрақұрылым да дамып, қызмет көрсету, логистика, техникалық сүйемелдеу және өңдеу бағытындағы қосымша жұмыс орындарының пайда болуына негіз қаланады.
Жобаның тағы бір маңызды қыры импортқа тәуелділікті төмендету. Қара уылдырық пен бекіре өнімдері әлемдік нарықта жоғары сұранысқа ие. Егер өндіріс тұрақты жолға қойылса, Маңғыстау тек ішкі нарықты қамтып қоймай, сыртқы нарыққа да сапалы өнім ұсынатын өңірге айналуы мүмкін.
«RED PEARL» балық фермасының құрылысы Маңғыстаудағы инвестициялық саясаттың жаңа бағытын көрсетеді. Табиғи ресурсқа бай өңір енді теңіз маңы экономикасын тек мұнаймен емес, аквакультура, өңдеу өнеркәсібі және экспорттық өнім арқылы да дамытуға ұмтылып отыр. Қызылөзенде басталған жоба сол өзгерістің нақты белгісі болмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
