Қазақстандық спортшыларды Олимпиада, Азия ойындары және өзге де кешенді жарыстарға алып баратын делегацияның құрамы енді нақты нормативпен белгіленеді. Әлихан Смайылов басқаратын Жоғары аудиторлық палатаның тексеруінен кейін жаттықтырушы, дәрігер, массажшы, психолог, штаб мүшесі мен ресми өкіл санын өз бетінше көбейтуге тосқауыл қойылды, деп хабарлайды Ertenmedia.kz.
Жаңа тәртіп Туризм және спорт министрінің 2026 жылғы 8 шілдедегі бұйрығымен бекітілген. Құжат спортшылар саны мен оларды алып жүретін мамандар арасындағы нақты арақатынасты белгілейді.
Өзгеріске Токиода өткен 2020 жылғы Олимпиадаға дайындыққа бөлінген бюджет қаражатының қаншалықты тиімді жұмсалғанын тексерген мемлекеттік аудит түрткі болған.
Делегация бұрын бірыңғай өлшемсіз жасақталған
Жоғары аудиторлық палата тексеру кезінде ұлттық делегацияны қалыптастырудың ортақ тәртібі болмағанын анықтады.
Бір спортшыға қанша жаттықтырушы, дәрігер, массажшы, психолог, штаб қызметкері немесе ресми тұлға ілесуге тиіс екені ешбір құжатта нақты көрсетілмеген. Сапарға шығатын қосалқы құрам әр жарыс алдында жеке-жеке белгіленіп отырған.
Соның салдарынан бір делегацияның неліктен шағын, екіншісінің не себепті тым ауқымды жасақталғанын салыстырып, бағалау мүмкін болмаған. Ең бастысы, спортшыларға қатысы шамалы адамдардың іссапар шығыны қаншалықты негізді екенін тексеретін бірыңғай өлшем болмады.
Аудиторлар мұндай тәсіл бюджет қаражатын жоспарлау мен бақылауды әлсіретіп, негізсіз шығынға жол ашатынын атап өткен.
Смайылов палатасы министрлікке нақты талап қойды
Аудит қорытындысымен Жоғары аудиторлық палата Туризм және спорт министрлігіне делегация құрамын реттейтін норматив әзірлеуді тапсырды.
Жаңа талап бойынша спортшылар санына шаққандағы жаттықтырушылардың, клиникалық-ғылыми топ мамандарының, штаб өкілдері мен ресми тұлғалардың оңтайлы үлесі алдын ала белгіленуге тиіс еді.
Министрлік палата нұсқамасын орындап, тиісті бұйрықты бекітті. Енді Олимпиада, Азия ойындары және басқа да ірі кешенді жарыстарға баратын делегация бұрынғыдай еркін жасақталмайды. Әр санаттағы маман саны белгіленген пропорцияға сай есептеледі.
Басымдық спортшыға тікелей қызмет ететін мамандарға беріледі
Жаңа норматив делегациядағы орынды ең алдымен спортшының дайындығы мен денсаулығына тікелей жауап беретін мамандарға бөледі.
Жаттықтырушы және медициналық құрам негізгі басымдыққа ие болады. Олардың қатарына дәрігер, массажшы, психолог және ғылыми сүйемелдеу мамандары кіреді.
Ал штаб мүшелері мен ресми өкілдердің саны шектеліп, әрқайсысының сапарға не үшін баратыны норматив арқылы негізделмек. Мұндай тәртіп спорттық жарысты қызметтік сапарға айналдыру қаупін азайтуға бағытталған.
Әр жолдама мен іссапар шығыны есепке түседі
Нормативтің енгізілуі делегация шығынын жарысқа дейін есептеуге мүмкіндік береді. Ұшақ билеті, қонақүй, тәуліктік төлем және өзге де іссапар шығыны енді алдын ала бекітілген адам санына сүйеніп жоспарланады.
Тексеру кезінде аудиторлар да әр маманның сапары бекітілген талапқа сай ма, жоқ па деген сұраққа нақты жауап бере алады. Бұрынғыдай «әр жағдайға қарай шешілді» деген жалпылама түсініктеме жеткіліксіз болады.
Жоғары аудиторлық палата қабылданған шара бюджет шығынының ашықтығын арттырып, қаржылық бақылауды күшейтеді және спорт делегациясына қатысы күмәнді адамдарды қосу тәуекелін қысқартады деп есептейді.
Токио Олимпиадасының қаржысын тексеруден басталған аудит ақырында бүкіл спорт саласына ортақ тәртіпке ұласты. Енді халықаралық жарысқа баратын әр адамның орны мен шығыны спортшыға тигізетін нақты пайдасымен өлшенуге тиіс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
