Қазақстандық кәсіпкер Сырымбек Тау АҚШ президенті Дональд Трамптың ұлы Дональд Трамп кішімен кездескенін хабарлады. Ол жүздесу кезінде тараптар еркін әңгімелесіп, өзара пікір алмасқанын әлеуметтік желідегі парақшасында жазды, – деп жазады Ertenmedia.kz.
Сырымбек Тау кездесуден түсірілген суретті жариялап, әңгіменің жақсы өрбігенін атап өтті. Кәсіпкер жазбасында екеуін де республикашыл саяси орта байланыстыратынын меңзеді. Сырымбек Тау Қазақстандағы Respublica партиясының өкілі болса, Дональд Трамп кіші АҚШ-тағы республикалық қозғалыстың танымал тұлғаларының бірі саналады.
«Екеуіміз де Respublica партиясының өкілдеріміз. Әңгімеміз жарасып, жақсы пікір алмастық», – деп жазды Сырымбек Тау. Кәсіпкер жүздесудің нақты тақырыбы мен өткен орны туралы қосымша мәлімет берген жоқ.
Сырымбек Тау кездесуді ұйымдастыруға көмектескен Жандос есімді азаматқа алғыс білдірді. Ол жазбасында Жандосты екі тараптың арасын жалғаған «алтын көпір» деп атады. Кездесудің ресми немесе іскерлік сипатта өткені жөнінде ақпарат жарияланбаған.
Дональд Трамп кіші АҚШ-тағы республикалық саяси ортада және әкесінің қоғамдық науқандарында белсенді көрініп жүрген тұлға. Сондықтан қазақстандық кәсіпкердің онымен жүздесуі әлеуметтік желі қолданушыларының назарын аударды. Алайда кездесу нәтижесінде қандай да бір уағдаластыққа қол жеткізілгені туралы әзірге мәлімет жоқ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
