Ford жаңа буындағы Bronco жол талғамайтын көлігінің дизайнын әзірлей бастаған тәрізді. Патенттік сызбалар 2030 жылға қарай нарыққа шығуы ықтимал модельдің алғашқы ерекшеліктерін аңғартты, – деп жазады Ertenmedia.kz.
Қазіргі Ford Bronco 2021 жылдан бері айтарлықтай өзгеріссіз шығарылып келеді. Жақын уақытта модельдің гибридті нұсқасы және оның базасында жасалған пикап таныстырылуы мүмкін. Алайда келесі онжылдық басталғанша толыққанды жаңа буын қажет болады, әйтпесе уақыт бір орында тұрмаған нарықта Bronco бәсекеге қабілетін жоғалтады.
Car and Driver басылымы Ford компаниясының кейінгі патенттік өтінімдерін зерттеп, жұмбақ жол талғамайтын көліктің сызбаларын тапқан. Көлік бірден екі құжатта көрсетілген. Алғашқы патент салонда ұйықтайтын орындарды ұйымдастыру тәсілдерін сипаттаса, екіншісі шешілетін есіктерді сақтауға арналған модульдік жүйеге қатысты.
Сызбалардағы модель Bronco-ға тән қырлы шанақ пішінін сақтап қалған. Радиатор торы үлкейіп, сыртқы бейнесі қазіргі Bronco-дан гөрі Scout Traveler жол талғамайтын көлігіне көбірек ұқсайды. Соған қарамастан дөңгелек шамдар мен тік пішінді алдыңғы бөлік әйгілі модельдің тарихи келбетін жалғастырады.
Көліктің артқы есік ойықтары мен доңғалақ аркалары қазіргі буындағы Bronco-мен салыстырғанда шағындау көрінеді. Осы ерекшелік болашақ модельдің жалпы өлшемі ықшам болуы мүмкін екенін аңғартады. Қазіргі жанға қарай ашылатын жүксалғыш есігінің орнына жоғары көтерілетін қақпақ қолданылған.
Жаңа құрылым Bronco-ның жол талғамайтын болмысын күнделікті пайдалануға ыңғайлы етуі мүмкін. Шешілетін есіктерді көліктің өзінде сақтайтын жүйе жүргізушіге оларды гаражда қалдырмай, сапар кезінде қайта орнатуға мүмкіндік береді. Салонда ұйықтайтын орын ұйымдастыру тетігі модельдің саяхат пен табиғат аясындағы демалысқа бағытталған сипатын күшейтеді.
Жақсы салытылған көлік
Дегенмен патенттік сызбалар болашақ сериялық модельдің нақты дизайнын бекітпейді. Өндірушілер мұндай шешімдерді алдын ала тіркеп, кейін олардың бір бөлігін ғана пайдалануы мүмкін. Сондықтан келесі Bronco дәл осы бейнемен конвейерге шығады деп кесіп айтуға әлі ерте.
Патенттер Ford-тың модельді түбегейлі өзгертуге асықпайтынын көрсетеді. Компания Bronco-ның танымал бұрышты сұлбасын сақтап, оны жаңа тұрмыстық және жолсыз жерге арналған мүмкіндіктермен толықтыруы ықтимал. Яғни жаңа буында революциялық бетбұрыстан гөрі таныс формуланы кезең-кезеңімен жетілдіру басым болады.
Мұндай сақтықтың экономикалық негізі бар. АҚШ-та Bronco сатылымы толық қамтылмаған 2021 жылғы 35 023 көліктен 2025 жылы 146 007 данаға дейін өсті. 2026 жылдың алғашқы жартысында америкалықтар 76 936 Bronco сатып алып, модельді жаңа рекордқа жақындатты.
Сұраныстың тұрақты өсуі Ford-қа Bronco-ның қалыптасқан бейнесінен бас тартпау керектігін көрсетіп отыр. Компания аңызға айналған жол талғамайтын көліктің мінезін сақтай отырып, шанағын ықшамдап, салон мүмкіндігін кеңейтуі мүмкін. Жаңа буынның сериялық нұсқасы мен техникалық сипаттамалары алдағы жылдары белгілі болады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
