Бүгін, 23 тамызда, Құрылтай депутаттарының сайлауы күні Жетісу облысының аудан-қалаларында қоғамдық көлік жолаушыларды тегін тасымалдап жатыр. Бастама сайлаушылардың елді мекендер ішінде еркін қатынап, дауыс беру учаскелеріне кедергісіз жетуіне жағдай жасауға бағытталған, – деп жазады Ertenmedia.kz.
Өңірдегі жолаушылар тасымалдаушыларының бастамасымен бүгін автобус бағыттарында жолақы алынбайды. Тегін тасымал тек сайлау күніне арналған. 24 тамыздан бастап қоғамдық көлік қалыпты күнделікті режимге оралады.
Талдықорған қаласында саяжай аумақтарында тұратын азаматтарға да қосымша жағдай жасалған. Олардың сайлау учаскелеріне жетуін жеңілдету үшін арнайы автобус бағыттары ұйымдастырылып отыр.
Мұндай шара жеке көлігі жоқ, қоғамдық көлікті тұрақты пайдаланатын тұрғындар үшін маңызды. Әсіресе сайлау учаскесінен шалғай тұратын азаматтардың дауыс беруге баруына көлік мәселесі кедергі келтірмеуі көзделген.
Жетісу облысында Құрылтай депутаттарының сайлауына арналған 468 сайлау учаскесі жұмыс істеп тұр. Олар таңғы сағат 07:00-де ашылып, сайлаушыларды 20:00-ге дейін қабылдайды.
Осылайша сайлау күні өңірдегі қоғамдық көлік жүйесі де дауыс беру процесін ұйымдастыруға жұмылдырылған. Тұрғындар елді мекен ішіндегі автобус бағыттарын тегін пайдаланып, өз сайлау учаскелеріне жете алады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
