Қызылорданың орталық алаңында жасөспірімдер арасында небәрі 1000 теңге қарыз үшін басталған жанжал адам өлімімен аяқталды. Төбелес кезінде 13 жастағы жеткіншек танысының кеуде тұсына үшкір бұрағыш сұғып алып, ауыр жарақаттанған бала ауруханаға жетпей көз жұмды, деп хабарлайды Ertenmedia.kz.
Анасының көз алдындағы қасірет
Жантүршігерлік оқиға қаланың дәл орталығында, халық көп жиналатын алаңда болған. Мәліметтерге сәйкес, марқұм Нұрисламбек пен оның танысы арасында ақша дауы туындап, арты төбелеске ұласқан.
Қайғылы жағдайдың ең сұмдығы – қанды оқиға марқұмның анасының көз алдында орын алған. Баласына қауіп төніп тұрғанын сезген ана жанұшыра айқайлап, көмекке ұмтылғанымен, ұлына үш-төрт қадам қалғанда үлгермей қалған. Жүрек тұсынан ауыр соққы алған Нұрисламбек сол жерде сұлап түскен.
Куәгерлердің айтуынша, шабуыл жасаған жасөспірім қолындағы қанды құралды лақтырып жіберіп, есеңгіреп қалған анадан кешірім сұраған. Алайда дәрігерлер жеткенше жасөспірім тіл тартпай кетті.
13 жасар күдікті және жазадан құтылу қаупі
Қайғылы жағдай бойынша полиция Қылмыстық кодекстің 106-бабы 3-бөлігі (абайсызда адам өліміне әкеп соққан денсаулыққа қасақана ауыр зиян келтіру) бойынша іс қозғады. Дегенмен күдіктінің жасы 13-те ғана болғандықтан, заң бойынша ол тергеу изоляторына емес, облыстық Кәмелетке толмағандарды бейімдеу орталығына оқшауланды.
Сонымен бірге тәртіп сақшылары ата-ананың баланы тәрбиелеу міндетін тиісінше орындамауы дерегімен тағы бір қылмыстық істі тіркеді.
Марқұмның отбасы қайғыдан қан жұтып отырған шақта, күдіктінің жас ерекшелігіне байланысты заң саңылаулары арқылы жазадан сытылып кетуінен қатты қауіптенеді. Олар құқық қорғау органдарынан істі созбалаңға салмай, әділ тергеу жүргізуді сұрауда.
«Қазір ол қамауда отыр. Алайда оның жақын күндері бостандыққа шығуы мүмкін деген ақпарат бізді қатты алаңдатып отыр. Біз кек алуды емес, әділдікті қалаймыз», – деп жазды марқұмның әпкесі.
Қолданыстағы заң бойынша Қазақстанда қылмыстық жауапкершілік 14 жастан басталатындықтан, 13 жастағы жасөспірімнің түрме жазасынан босатылып, тек арнайы мектепке жіберілуі немесе ата-анасының бақылауына берілуі мүмкін екені қоғамда үлкен наразылық туғызып отыр.
1000 теңге үшін адам өлтіру: кінә кімде?
Бір қорап темекі немесе бір құты тәтті сусынның құны үшін адам өмірін қия салу – қоғамның қаншалықты деградацияға ұшырағанын көрсететін қорқынышты диагноз. Қалтасына бұрағыш пен суық қару салып, көзге көрінбейтін қылмыс әлемінің ережелерімен өмір сүретін мұндай қатыгез ұрпақтың қалыптасуына кім кінәлі?
Біріншіден, балаларының қолына не ұстап, кіммен араласып жүргенін білмейтін, күнкөрістің қамымен тәрбиені сыртқа ысырып қойған отбасының жауапкершілігі зор. Екіншіден, мектептердегі формалды «сынып сағаттары» мен жасөспірімдер арасындағы жасырын буллинг пен бопсалауды көрмейтін білім беру жүйесінің де салғырттығы бар. Үшіншіден, көшедегі криминалдық романтика мен зорлық-зомбылықты насихаттайтын желілік контентке ешқандай сүзгінің жоқтығы осындай қайғылы оқиғаларға жол ашуда.
Адам өмірінің құны 1000 теңгеге теңескен қоғамның келешегі бұлыңғыр. Бұл оқиға тек Қызылорданың емес, тұтас еліміздің кәмелетке толмағандар арасындағы заңнамасын қатаңдатып, балалар тәрбиесіне мемлекеттік деңгейде түбегейлі бет бұру қажеттігін ескерткен соңғы дабыл болуы тиіс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
