Кейінгі бірнеше күннен бері Қазақстанның батыс өңіріне дрон құлағаны туралы ақпарат тарап жүр. Әскери сарапшы, танымал журналист Амангелді Құрметұлы осы турасында өз болжамын айтты, — деп хабарлайды ErtenMedia.
Бұл туралы ол желідегі парақшасында жазды.
«Батыс Қазақстан облысы жеріне белгісіз аппарат құлапты. Ресейлік және отандық бірқатар медиа француздың SAGEM компаниясы жасаған Crecerelle барлау дроны болуы мүмкін екенін жазды. Бірақ Crecerelle екінші суретте тұр. Бірінші суреттегі басқа дрон. Француз емес, ресейлік «Орлан 10» ға ұқсайды негізі. Ашық дерек көздерінен Crecerelle-дің бірінші суреттегіге ұқсас модификациясын таппадым. Ал «Орлан 10» оған біршама ұқсайды. Демек өткенде Ресей жеріндегі Қазақстан мұнайына арналған «Кропоткинская» мұнай айдау стансасына жасалған дрон шабуылына да сәл күмәнмен қарау керек сияқты», — деді ол.
Айта кетейік, 17 ақпанда Каспий құбыр консорциумының (КҚК) ең ірі мұнай айдау станциясы саналатын Ресей Федерациясындағы «Кропоткинская» ЖЗҚ шабуылға ұшырады. Шабуылдан зардап шеккендер жоқ.
Станция қаншалық зақымға ұшырағанын және қалпына келтіру мерзімдерін бағалау үшін КҚК бас директоры Николай Горбан бастаған басқарушы топ оқиға орнына барды.
Кейінірек «Транснефть» компаниясы мәлімдеме жасап, Каспий құбыр консорциумының (КҚК) «Кропоткинская» ірі мұнай айдау станциясына жасалған дрон шабуылы салдарынан Қазақстаннан мұнай айдау көлемі шамамен 30 пайызға төмендеуі мүмкін екені айтылды.
Ал Қазақстанның Сыртқы істер министрлігі бұл мәселе Украина тарапымен талқыланатынын хабарлады. Десе де Мәжіліс депутаты Никита Шаталов Каспий құбыр консорциумына (КҚК) шабуыл жасау туралы шешім қабылдағандар жазалануы керек екенін мәлімдеді.
