Алматы облысында көктемгі егіс науқаны басталды. Биыл егіс алқабы 13 мың гектарға ұлғайып, жалпы көлемі 436,8 мың гектарға жетті. Өңірде дала жұмыстары қарқынды жүргізіліп, фермерлерге мемлекет тарапынан жан-жақты қолдау көрсетілуде, деп хабарлайды Ertenmedia.kz
«Кең Дала» бағдарламасы аясында көктемгі дала жұмыстарына 15,7 млрд теңге несие бөлінді. Ауыл шаруашылығы басқармасы мамандарының айтуынша, Аграрлық несие корпорациясы шаруашылықтардан жалпы сомасы 2,3 млрд теңгеге 56 өтінім қабылдады. Бұдан бөлек, өсімдік шаруашылығын қолдауға қосымша 3,4 млрд теңге бағытталды.
«Биылғы негізгі міндетіміз – егіс науқанын қысқа мерзімде және барынша тиімді өткізу. Фермерлерге тұқым, тыңайтқыш, жанармай мен техника беріледі. Мемлекеттік қолдау барлық ауыл шаруашылығы жұмыстарының кезеңінде жалғасады», — деп атап өтті ауыл шаруашылығы басқармасының өкілі.
Егіс науқанына дайындық барысында өңір аграршылары 4650 тонна дизель отынымен жеңілдетілген бағамен (литрі 250 теңге) қамтамасыз етілді. Өнімділікті арттыру мақсатында 16 000 тонна минералды тыңайтқыш жеткізілді, ал қосымша 77 шаруашылық 4 тонна тыңайтқыш сатып алуға келісім жасады. Жалпы, биыл минералды тыңайтқыштарды пайдалану көлемі 25%-ға артады деп күтілуде.
Ауыл шаруашылығы техникасын жаңарту да басты міндеттердің бірі болып отыр. Қазіргі уақытта облыстағы техниканың 58%-ы 25 жылдан астам уақыттан бері пайдаланылуда. Осыған байланысты 2025 жылы 665 бірлік жаңа техника сатып алу жоспарланған, оның ішінде лизингтік бағдарламалар да қарастырылған.
Сондай-ақ, жер ресурстарын тиімді пайдалану үшін су үнемдеу технологияларын енгізуге ерекше көңіл бөлінуде. Алдағы уақытта өңделетін жер көлемін 93,6 млн гектарға дейін жеткізу жоспарланған.
Осылайша, мемлекеттік қолдау, техникалық жаңарту және заманауи агротехнологияларды енгізу арқылы өңірдің ауыл шаруашылығы қарқынды дамып, азық-түлік қауіпсіздігін қамтамасыз етіп, аграрлық нарықтағы позициясын нығайтуда.
