Қазақстанда 2025–2030 жылдарға арналған «Заң және тәртіп идеологиясы» тұжырымдамасын іске асыру басталды. Құжаттың негізгі мақсаты қауіпсіздікті күшейту, заңға сенімді арттыру және тәртіпке қоғамды барынша тарту. Соңғы жылдары жергілікті қауымдастықтардың белсенділігі өскені байқалады. Мысалы, 370 елді мекеннің тұрғындары өздері бастама көтеріп, алкогольден бас тартты. Мемлекет үшін де, қоғам үшін де бұл нақты жауапкершіліктің белгісі.
Тұжырымдаманың маңызды бағытының бірі интернет алаяқтықпен күрес саналады. Ұялы байланыс операторларымен бірге шетелдік жалған нөмірлерден келетін қоңырауларға техникалық кедергі қойылған. 2022 жылдың қарашасынан бері мұндай 67 миллионнан астам қоңырау бұғатталды.
Ондаған sim-бокс пен ондаған мың sim-карта анықталды. Құқық қорғау органдары мен операторлар арасындағы меморандум аясында жаңа алаяқтық тәсілдерін ертерек анықтау жұмысы жалғасып жатыр.
Нашақорлыққа қарсы күрес бөлек кешен ретінде қаралып отыр. 2026–2028 жылдарға арналған жаңа жоспар дайындалуда. Тамыз айында Премьер-Министрдің басшылығымен Республикалық штаб құрылып, профилактика мен наркобизнестің жолын кесу жөніндегі шараларды үйлестіріп отыр. Мақсат – тек қылмыстық істерді көбейту емес, тәуелділікке әкелетін орта мен себептерді азайту.
Жыл басында полицияның аумақтық бөлімшелерінде отбасындағы зорлық-зомбылықпен күресетін арнайы бөлімшелер жұмысын бастады. Сонымен қатар, құқық бұзушылықтың алдын алу туралы жаңа заң жобасы Мәжіліске енгізілді. Онда заңға сай мінез-құлықты қалыптастыру, құқық бұзушылықтың себептерін азайту, азаматтардың қатысуын кеңейту сияқты міндеттер қамтылған.
Әйелдер құқығы мен балалар қауіпсіздігі туралы заң аясында жеңіл дене жарақатын салу және ұру бойынша екі жарым мыңға жуық факт тергеліп жатыр.
Азаматтық қорғау саласында да қозғалыс бар. Тоғыз айдың ішінде құтқару бөлімшелері 78 мыңнан астам рет шыққан. Жиырма мыңнан астам адам құтқарылып, эвакуацияланған, мыңдаған азаматқа алғашқы медициналық көмек көрсетілген. Өрт жағдайы тәулік бойы бақылауда. Орман шаруашылықтарындағы бейнебақылау жүйелері ТЖМ-нің ситуациялық орталығына қосылған, сол арқылы табиғи өрттерге жедел әрекет ету мүмкіндігі артып отыр.
Жыл басынан бері 10 жаңа өрт депосы ашылып, өңірлерде 78 заманауи өрт бекеті құрылды. Министрліктің техника паркі де жаңарып келеді, ұшақтар, тікұшақтар, арнайы техника мен дрондар сатып алынуда.
Сейсмикалық қауіпті ескеріп, Алматыда Қазақстан–Қытай сейсмология орталығын құру туралы меморандумға қол қойылды. Бұл жер сілкінісін болжау мен ғылыми талдауда қосымша мүмкіндік береді. Өндірістік нысандарда цифрлық шешімдер енгізіліп, қызметкерлердің орналасуын қашықтан бақылау жүйелері қолданыла бастады, қауіпсіздік талаптары күшейтілуде.
Қорғаныс саласында аумақтық қорғаныс, резервтік қызмет және әскери-патриоттық тәрбие туралы заңдар қабылданды. Әскери қызметін өтеп жүрген 8 мыңға жуық сарбазға отандық жоғары оқу орындарында тегін оқу үшін сертификат берілді. Тағы 4,5 мыңға жуық сарбазға сұранысқа ие азаматтық мамандық бойынша біліктілік құжаты тапсырылды.
«SMART Военкомат» жүйесі арқылы 16 жастан 60 жасқа дейінгі азаматтарға қатысты әскери есепке алу рәсімдері кезең-кезеңімен цифрлық форматқа көшіріліп жатыр.
Жалпы алғанда, қабылданып жатқан шаралар қауіпсіздікке тек күштік құрылымдардың жұмысы ретінде емес, бүкіл қоғамның ортақ ісі ретінде қарау бағытында.
Заңға құрмет, тәртіпке жауапкершілік, цифрландыру мен алдын алу тетіктері бір жүйе ішінде біріктіріліп отыр. Мемлекеттің де, азаматтардың да мақсаты ортақ, тыныш әрі қауіпсіз орта қалыптастыру.
