Премьер-министрдің орынбасары Қанат Бозымбаев Энергетика және коммуналдық секторды жаңғырту жөніндегі ұлттық жобаның іске асырылу барысын тексерді, деп жазады Ertenmedia.kz.
Жиында жобаларды қаржыландыру, отандық тауар өндірушілер өнімдерін пайдалану деңгейі, сатып алу рәсімдері және тұрғын үй көмегін проактивті форматта көрсету мәселелері қаралды.
Ұлттық жобаның электрондық платформасында жалпы құны шамамен 1,4 трлн теңге болатын 520 жоба тіркелген. Соның ішінде 554 млрд теңге сомасындағы 244 жоба сатып алу рәсімдерінің әртүрлі кезеңінде тұр.
Ұлттық экономика министрлігінің мәліметінше, пилоттық жобаларды қоса алғанда, жалпы құны 371 млрд теңгеден асатын 127 жоба бойынша конкурстық рәсімдер аяқталған. Қазір жобалау және құрылыс-монтаж жұмыстары жүргізіліп жатыр.
Биыл ұлттық жоба аясында «қызыл аймақтағы» нысандар санын және инженерлік желілердің сыни тозу деңгейін төмендету күтіледі. Жылумен жабдықтау саласында мұндай жұмыс Павлодар, Солтүстік Қазақстан, Маңғыстау, Қарағанды және Ақмола облыстарында жүргізіледі. Электрмен жабдықтау бағытында Жамбыл, Батыс Қазақстан, Солтүстік Қазақстан, Қарағанды, Абай облыстары мен Алматы қаласында жағдайды жақсарту жоспарланған.
Сумен жабдықтау саласында Жетісу, Түркістан, Алматы, Жамбыл және Қарағанды облыстарында тозған инфрақұрылымды жаңарту көзделіп отыр. Су бұру жүйесі бойынша Жетісу, Қарағанды, Батыс Қазақстан, Алматы, Түркістан және Ақтөбе облыстарында, сондай-ақ Шымкент қаласында тиісті жұмыстар атқарылады.
БЖЗҚ қаражаты коммуналдық инфрақұрылымға бағытталады
Қанат Бозымбаев әкімдіктерге Өнеркәсіп және құрылыс министрлігімен, Ұлттық экономика министрлігімен және «ҚазОрталық ТКШ» АҚ-мен бірлесіп, жобаларды іске асыру қарқынын жеделдетуді тапсырды. Өңірлерде жөндеу жұмыстарына дереу кірісу қажеттігі айтылды.
Сонымен қатар 2026 жылғы 1 маусымға дейін Энергетика және коммуналдық секторды жаңғырту жобаларының электрондық платформасы арқылы 2027 жылға арналған барлық өтінімді енгізу міндеті қойылды.
Вице-премьер ұлттық жоба аясындағы жобалардың елеулі бөлігі квазимемлекеттік және жекеменшік сектордың ірі компанияларына тиесілі екенін атап өтті. Осыған байланысты «Бәйтерек» холдингіне Ұлттық экономика министрлігімен бірлесіп, екінші деңгейлі банктер мен халықаралық қаржы ұйымдары арқылы қаржы тартатын жеке компанияларды сүйемелдеуді күшейту тапсырылды.
Бұдан бөлек, Қанат Бозымбаев Бірыңғай жинақтаушы зейнетақы қоры қаражатын тарту мүмкіндігін пысықтап, 2026 жылғы 1 маусымға дейін Үкімет аппаратына нақты ұсыныстар енгізуді тапсырды.
Отырыста сатып алу рәсімдеріндегі жүйелі мәселелер мен отандық өндірушілерге басымдық беру жайы да кеңінен талқыланды. Өнеркәсіп және құрылыс министрлігіне «ҚазОрталық ТКШ» АҚ және Табиғи монополияларды реттеу комитетімен бірлесіп, бір апта ішінде барлық жобаға талдау жүргізу жүктелді. Негізгі мақсат – қазақстандық өндіріс тауарларын барынша пайдалану.
Сондай-ақ табиғи монополия субъектілері мен EPC-мердігерлер тарапынан отандық өндірушілер өнімін сатып алу бойынша тұрақты мониторинг жүргізу тапсырылды.
520 жоба – 1,4 трлн теңге
Қанат Бозымбаев қазақстандық тауарларды жобалау кезеңінен бастап қолдану қажет екенін айтты. Оның сөзінше, өнімнің қажетті көлемде, сапада және белгіленген мерзімде жеткізілуі үшін отандық өндірушілермен өзара жұмысты нақты жолға қою маңызды.
Күн тәртібіндегі тағы бір мәселе тұрғын үй көмегін есептеу мен тағайындау үдерістерін автоматтандыруға арналды. Бұл жұмыс бірыңғай есеп айырысу орталықтары операторларымен интеграция арқылы іске асады.
Еңбек және халықты әлеуметтік қорғау министрлігі сервистердің техникалық және ұйымдастырушылық тұрғыдан толық дайын екенін хабарлады. Өнеркәсіп және құрылыс министрлігі ақпараттық қауіпсіздік талаптарына сәйкестік аттестатынан өткен 12 бірыңғай есеп айырысу орталығы операторын «Әлеуметтік көмек» ақпараттық жүйесімен интеграциялау жұмысын жүргізіп жатыр.
Отырыс қорытындысы бойынша Қанат Бозымбаев Еңбек және халықты әлеуметтік қорғау министрлігіне Өнеркәсіп және құрылыс министрлігімен және әкімдіктермен бірлесіп, 2026 жылғы 1 шілдеге дейін бірыңғай есеп айырысу орталықтарымен толық интеграцияны аяқтауды тапсырды.
Коммуналдық инфрақұрылымды жаңғырту ел үшін әлеуметтік тұрғыдан өте сезімтал бағыт саналады. Жылу, жарық, су және су бұру жүйесіндегі тозу деңгейі төмендемейінше, өңірлердегі өмір сапасын арттыру қиын. Сондықтан ұлттық жобаның тиімділігі тек бөлінген қаржы көлемімен емес, нақты іске қосылған нысан, сапалы жөндеу, отандық өнімнің үлесі және тұрғындарға қызмет көрсету жылдамдығымен өлшенбек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
