Шетелдік беделді жоғары оқу орындарында «Болашақ» бағдарламасы бойынша білім алып жатқан студенттер әлеуметтік желілерде патриоттық флешмоб бастап, ел тұрғындарын Республика күнімен құттықтады, деп хабарлайды Ertenmedia.kz.
Әлемнің түкпір-түкпірінен жеткен ыстық сәлем
Қазақстандық жастар бейнеүндеулер арқылы отандастарына ақжарма тілектерін арнады. Құттықтаулар Ұлыбритания, АҚШ және өзге де көптеген мемлекеттерден жолданған. Отаннан жырақта жүрсе де, студенттер ұлттық мерекені атап өтуге белсенді атсалысып, туған елге деген сүйіспеншіліктерін білдірді.
Мерекелік бастама қашықтыққа қарамастан әлемнің түкпір-түкпіріндегі қазақ жастарын бір арнаға тоғыстырып, ұлттық рухтың биік екенін айшықтады.
Отанмен байланыс үзілмейді
Аталған акция жастарға халықаралық деңгейде сапалы білім алуға жол ашқан «Болашақ» бағдарламасының стипендиаттарын ортақ мақсатқа біріктірді. Студенттер үшін бұл қадам туған жермен рухани байланысты нығайтудың және мереке қуанышын отандастарымен бөлісудің тамаша үлгісі болды.
Әлеуметтік желілерге тараған құттықтаулар Республика күнінің әлемнің қай нүктесінде жүрсе де барша қазақстандық үшін орны бөлек екенін тағы бір мәрте дәлелдеді. 25 қазанда еліміз мемлекеттілік пен егемендіктің символына айналған басты ұлттық мерекені атап өтеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
