Азияның мемлекет қайраткерлері, ірі инвесторлары мен бизнес көшбасшылары бөлшектенген жаһандық тәртіп жағдайында тек сырттай бақылаушы болудан бас тартты. Олар Вашингтон мен Бейжің арасындағы текетіресте біржақты таңдау жасаудың орнына, стратегиялық икемділікке және прагматикалық серіктестікке ден қойып отыр, деп хабарлайды Ertenmedia.kz.
Уақытша дағдарыс емес, жаңа экономикалық норма
Сингапурде ұйымдастырылған Reuters NEXT Asia жиынында сөз сөйлеген үкімет мүшелері, ұлттық әл-ауқат қорлары мен жеке инвестициялық компаниялардың басшылары ортақ ұстанымын білдірді. Олардың пайымынша, геосаяси шиеленістер өтпелі қиындық емес, керісінше жаһандық кеңістіктің ұзақмерзімді құрылымдық ерекшелігіне айналды. Сондықтан қысқамерзімді әрекеттердің орнына жан-жақты ойластырылған стратегиялар қажет.
Аймақ елдері Вашингтон немесе Бейжіңнің біреуіне толық арқа сүйеуден саналы түрде тартынып, салалық ерекшеліктерге сай түрлі ойыншылармен тиімді байланыс орнатуды көздейді.
Тайланд тәжірибесі: сапа мен «сенімді дәнекер» рөлі
Таиланд бұл жағдайға белсенді сыртқы саясат пен прагматикалық инвестиция арқылы бейімделуде. Ел тек ақша тартумен шектелмей, жобалардың нақты пайдасына мән береді. Шетелдік капиталдың шыққан тегінен бұрын, оның отандық нарыққа технология әкелуі, білікті жұмыс орындарын ашуы және өндірістік тізбектерді күшейтуі бірінші орынға шықты.
«Біз осы бөлшектенген әлемде сенімді дәнекер болуға ұмтыламыз. Кейбір салаларда белгілі бір топтармен ынтымақтасу әлдеқайда ұтымды», – деді Таиландтың қаржы вице-министрі Сантитарн Сатиратхай.
Бұл тәсіл Азия мемлекеттерінің алпауыттар қақтығысына тартылмай, экономикалық мүдделерін дербес қорғауға тырысып жатқанын анық көрсетеді.
«Сабырлы капитал» мен нарық өсімі
Ұзақмерзімді инвесторлар да осындай көзқарасты ұстанады. Hong Kong Investment Corporation бас директоры Клара Чан белгісіздік жағдайы «сабырлы капитал» үшін жаңа мүмкіндіктер көзі екенін атап өтті. Төрт жыл ішінде 200-ден астам компанияға қаржы салған аталған құрылым Гонконгтың халықаралық қаржы орталығы және Қытай нарығына шығу қақпасы ретіндегі әлеуетін толық пайдаланып келеді.
Өз кезегінде жеке капитал нарығының өкілдері геосаяси қысым Азияның тартымдылығын төмендетпегенін, керісінше арттыра түскенін алға тартады.
«2030 жылға қарай әлемдегі орта таптың үштен екісі Азияда болады және жаһандық өсімнің 60 пайызы осы өңірден қамтамасыз етіледі. Сондықтан нарық қатысушылары өз активтерін белсенді түрде осы аймаққа бағыттап жатыр», – деп түсіндірді Goldman Sachs өкілі Стефани Хуэй.
Аймақтың сан қырлы мүмкіндіктері
Сарапшылардың пікірінше, Азияның басты артықшылығы – оның ішкі әралуандығында. Bain Capital бас стратегі Сатоши Уэяма Жапониядағы корпоративтік басқару реформаларын, Үндістанның демографиясы мен инфрақұрылымдық өсімін, Қытайдың үздіксіз технологиялық жаңалықтарын және Оңтүстік-Шығыс Азияның жеткізу тізбегін әртараптандырудағы рөлін басты қозғаушы күштер ретінде атады.
Нәтижесінде Азия алыптар бәсекесінің алаңына айналмай, жаһандық өзгерістерді өз экономикалық мүддесіне бейімдейтін дербес күшке айналуға ниетті.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
