АҚШ-та 3 қарашада өтетін Конгреске аралық сайлауға санаулы күндер қалғанда, саяси бәсеке шарықтау шегіне жетті. Соңғы сауалнама нәтижелеріне сәйкес, Демократиялық партия өкілдері Өкілдер палатасын қайтарып қана қоймай, Сенатта да бақылау орнатуға жақын тұр, деп хабарлайды Ertenmedia.kz.
Сайлау науқаны аяқталуға таяған шақта 31 миллионнан астам америкалық мерзімінен бұрын дауыс беріп үлгерді. Қарашадағы саяси дода президент Дональд Трамптың екінші президенттік мерзімінің соңғы екі жылындағы мемлекеттік шешімдер мен билік бағытына тікелей ықпал етпек.
Шешуші штаттардағы күрес және сауалнама нәтижелері
CNN жүргізген соңғы әлеуметтік зерттеулер бірқатар шешуші штаттарда күтпеген өзгерістер орын алғанын көрсетті. Әдетте республикашылардың мызғымас бекінісі саналатын Техас штатында демократ Джеймс Таларико (49%) Бас прокурор Кен Пакстоннан (43%) алты пайызға алда тұр. Ал Мичиганда демократиялық үміткер Абдул Әл-Сайед (49%) қарсыласы Майк Роджерстен (42%) айтарлықтай басым түсіп келеді.
Мэн штатында Трой Джексон сенатор Сьюзан Коллинзден алға шықса, Канзаста да демократтар көш бастап тұр. Тіпті Оңтүстік Каролина секілді консервативті штатта үміткерлердің көрсеткіші 48%-дан тең түсті. Бұл саяси картаның күрт өзгергенін және Сенаттағы көпшілікті қайтару демократтар үшін қолжетімді мақсатқа айналғанын білдіреді.
«Мен бәріне вето қоямын, содан кейін демократтар келісімге келуге мәжбүр болады», – деп мәлімдеді президент Дональд Трамп оппозициялық Конгреспен қарым-қатынас орнату туралы сұраққа жауап бере отырып.
Трамп әкімшілігі мен Конгресс арасындағы текетірес
Сарапшылардың болжамынша, егер Демократиялық партия Конгрестің кемінде бір палатасын өз бақылауына алса, Ақ үй саясатына қатаң шектеулер қойылады. Оппозициялық заң шығарушылар мемлекеттік шығындарды реттеу, әкімшілік әрекеттеріне қатысты парламенттік тергеу жүргізу және Трамптың кадрлық шешімдерін қадағалау мүмкіндігіне ие болады.
Жалпыұлттық сауалнамалардың орташа көрсеткіші де демократтардың пайдасына шешіліп отыр: респонденттердің 52 пайызы Конгресте демократтарды, ал 43 пайызы республикашыларды қолдайтынын білдірген. Сайлаушылардың басты алаңдаушылығы ретінде елдегі инфляция, импорттық тарифтерге байланысты қымбатшылық және сыртқы саясаттағы дағдарыстар аталды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
