Вашингтонда федералдық жоспарлау комиссиясы АҚШ президенті Дональд Трамп ұсынған 76 метрлік (250 фут) алып салтанат қақпасының жобасын ресми түрде мақұлдады, деп хабарлайды Ertenmedia.kz. Алайда бұл шешім шыққаннан кейін көп ұзамай федералды сот аталған аумақта құрылыс бастауға уақытша тыйым салды.
Ақ үйдің асығыс қадамы
Ұлттық астананы жоспарлау комиссиясы (NCPC) тоғыз сағаттан астам уақытқа созылған қызу талқылаудан кейін монумент жобасын 8-4 дауыспен қабылдады. Жобаны қолдағандар негізінен федералды билік пен қазіргі әкімшілік өкілдері болса, Вашингтон қаласының атынан қатысқан кеңес мүшелері түгелге дерлік қарсы шықты.
Ақ үй бұл нысанды АҚШ тәуелсіздігінің 250 жылдығына орайластырып, президент Трамптың өкілеттігі аяқталғанға дейін тұрғызып бітуді көздеп отыр. Сондай-ақ өткен аралық сайлаудан кейін қаңтар айында Конгреске демократтар келгенге дейін жұмысты дереу бастауға асыққан. Комиссия төрағасы Марк Паолетта монументтің маңызы туралы пікірін білдірді.
«Президент Трамп мемлекет басшысы әрі білікті құрылысшы ретінде біздің кім екенімізді осындай еңселі ескерткіштер арқылы көрсету ұлттық болмысымыз үшін маңызды екенін терең түсінеді», – деді ол.
Ардагерлер мен қала тұрғындарының қарсылығы
Жобаға сәйкес, триумфалдық арка Потомак өзенінің маңындағы «Мемориалдық шеңбер» аумағында бой көтеруі тиіс. Бұл орын әйгілі Линкольн мемориалы мен қаза тапқан сарбаздар жерленген Арлингтон ұлттық зиратының дәл аралығында орналасқан.
Жобаға қарсы шыққан соғыс ардагерлері мен тарихи мұраны қорғаушылар алып құрылыс астананың тарихи панорамасын бұзатынын айтады. Олардың пікірінше, 76 метрлік нысан қасиетті Арлингтон зиратында өтетін әскери жерлеу рәсімдерінің тыныштығын кетіреді. Бұған қоса, заңгерлер мен қоғам өкілдері бұл монументті салуға Конгрестің рұқсаты алынбағанын, бұл АҚШ-тың естелік нысандар туралы заңына қайшы келетінін алға тартып, сотқа жүгінді.
Президент Трамптың өзі бұған дейін аталған қақпа тек көрнекі ескерткіш қана емес, сонымен бірге дрондар мен оқ-дәрілерді сақтайтын, мергендерге арналған әскери кешен болатынын мәлімдеген. Дегенмен комиссияға бекітуге ұсынылған ресми құжаттарда әскери мақсаттағы бөлшектер ашық көрсетілмеген немесе құпия санатта қалдырылған.
Сот араласып, құрылысты тоқтатты
Жоспарлау комиссиясы соңғы рұқсатты бергеннен кейін көп ұзамай АҚШ округтік сотының судьясы Таня Чуткан шұғыл қаулы шығарды. Судья Колумбия округі, Вирджиния штаты және Вьетнам соғысы ардагерлері тобы берген шағымды қарап, билікке құрылыс жұмыстарын бастауға тыйым салды.
«Үкімет алдағы 14 күн ішінде, іс бойынша сот талқылаулары жүріп жатқан мерзімде бұл аумақта құрылысқа қатысты кез келген әрекетті тоқтатуға міндетті».
Соттың мұндай шешімі Ақ үйдің жобаны жылдам бастау туралы жоспарына елеулі кедергі келтірді. Алдағы екі аптада тараптардың дәлелдері сотта жан-жақты қаралып, алып монументтің тағдыры бойынша жаңа шешім қабылданбақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
