Валюта бағамының көрсеткіші өзіндік деңгейде маңызды болғанымен, ол инвесторға қаржыны нақты қай активке салу қажеттігін анықтап бере алмайды, деп хабарлайды Ertenmedia.kz.
Қаржы нарығында қалың бұқара мен инвесторларды көбіне «Жыл соңында доллар қанша болады: 400 ме, 500 бе, әлде 550 ме?» деген сұрақ мазалайды. Теңге бағамы көпшілік үшін ең түсінікті индикатор саналғанымен, сарапшылар болжамының арасы өте алшақ.
Мәселен, Ұлттық банктің тамыз айындағы макроэкономикалық сауалнамасында доллардың орташа бағамы 2026 жылы 490 теңге, 2027 жылы 516,2 теңге, ал 2028 жылы 562,2 теңге деңгейінде болатыны көрсетілген. Дегенмен валюта бағамын болжау нақты жауабы жоқ салалардың қатарына жатады.
AMarkets компаниясының сарапшысы Дәурен Жәңгірдің айтуынша, бағам бойынша жасалған кез келген болжам инвестициялық белгі ретінде емес, жеке қаржы моделіне енгізілетін сценарийлердің бірі ретінде ғана қарастырылуы тиіс.
«Бір ғана бағамның өзі белгілі бір инвестор үшін пайдалы, ал екіншісі үшін мүлдем маңызсыз болуы ғажап емес. Одан гөрі қаражаттың қандай валютада қажет болатынын, қандай мерзімге инвестицияланатынын, портфель қандай кіріс әкелетінін және инвестор қандай құлдырауға төтеп бере алатынын түсіну әлдеқайда маңызды», — дейді сарапшы.
Бағамның бағытын дәл тапқан күннің өзінде инвестор баламалы активке қарағанда азырақ табыс табуы мүмкін. Ең басты қағида: бағамның болжамы табыстылық көрсеткішін білдірмейді.
Кірістілік қалай есептеледі?
Маман мәселені қарапайым мысалмен түсіндірді. Доллардың бастапқы бағамы 450 теңге болған жағдайда екі түрлі құралға қаржы салуға болады: жылдық табыстылығы 16% теңгелік актив немесе 5% кіріс әкелетін долларлық актив.
Егер бір жылдан кейін доллар бағамы 400 теңгеге түссе, теңгедегі актив долларлық мәнде шамамен 30,5% кіріс әкеледі. Егер бағам 500 теңгеге дейін өссе, теңгелік құралдың доллардағы кірісі шамамен 4,4%-ды құрайды. Ал бағам 550 теңгеге жеткен жағдайда, теңгелік инвестицияның нәтижесі теріс деңгейге, яғни -5%-ға түседі.
Осылайша, инвестор валютаны ғана емес, болашақ кірістілікті сатып алады. Доллар сатып алған адам жоғары пайызды депозиттер мен облигациялардан түсетін теңгелік балама табыстан бас тартады. Сондықтан сауатты шешім қабылдау үшін теңгелік активтің кірісін есептеп, бағамның ықтимал өзгерісін ескере отырып, оны долларлық активтің табыстылығымен салыстыру қажет.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
