Қазақстан қаржыгерлер қауымдастығы сауалнамасына қатысқан сарапшылардың 85 пайызы Ұлттық банктің 23 қазандағы отырысында базалық мөлшерлеме төмендейді деп болжайды, деп хабарлайды Ertenmedia.kz.
Қаржы нарығының кәсіби қатысушылары арасында жүргізілген қазан айындағы зерттеу нәтижесі бойынша респонденттердің басым бөлігі көрсеткіштің 15,75-16,00 пайыз аралығына дейін азаятынын күтуде. Олардың 71 пайызы реттеуші мөлшерлемені 0,25 пайыздық тармаққа, яғни 16 пайызға дейін ғана түсіреді деген пікір білдірген.
Инфляциялық күтулер және жеңілдету шегі
Сарапшылардың ақша-несие саясатын жұмсартуды күтуіне жылдық инфляцияның біртіндеп бәсеңдеуі мен тұтынушылық сұраныстың тежелуі негіз болды. Сауалнамаға қатысушылар алдағы 12 айда баға өсімі бұрын болжанған 10,4 пайыздың орнына 9,7 пайыз деңгейінде қалыптасады деп есептейді. Ал бір жылдан кейінгі базалық мөлшерлеме 14,5 пайыз көлемінде болады деп бағаланды.
Дегенмен реттеушінің мөлшерлемені одан әрі күрт түсіру мүмкіндігі шектеулі. Себебі коммуналдық тарифтердің көтерілуі, бюджеттік ынталандыру шараларының күшеюі және сыртқы баға тұрақсыздығы қатер төндіріп тұр. Бұған дейін Ұлттық банк 2027 жылға арналған инфляция болжамын 6,5-8,5 пайызға дейін арттырып, жеңілдету ауқымы тар екенін ескерткен болатын.
Доллар бағамы мен теңгенің жағдайы
Қаржы нарығы сарапшыларының теңгеге қатысты болжамы айтарлықтай жақсарды. Респонденттер қараша айының басында доллар бағамы 456,5 теңге шамасында болады деп есептейді, бұл өткен айдағы 474,2 теңгелік көрсеткіштен әлдеқайда төмен. Сондай-ақ бір жылдық кезеңдегі америкалық валюта құны бойынша күтулер де 511,6 теңгеден 502,6 теңгеге дейін оңтайландырылды.
Ұлттық валютаның тұрақтылығына теңгелік активтердің жоғары табыстылығы, Қазақстанның егемендік рейтингінің артуы және шетелдік инвесторлардың мемлекеттік бағалы қағаздарға қаржы салуы оң ықпал етуде. Оған қоса, сауда профицитінің сақталуы, Ұлттық банктің нарықтағы сату операциялары мен Ұлттық қордан 2027 жылы бөлінетін трансферттер көлемінің 4,4 триллион теңгеге дейін ұлғаюы да теңгені демейді.
Мұнай бағасы мен экономикалық өсім
Сауалнама қорытындысы Brent маркалы мұнай бағасына қатысты болжамның біршама төмендегенін көрсетті. Алдағы бір жылда шикізат бағасы барреліне бұрынғы 83,7 доллардың орнына 79 доллар деңгейінде саудаланады деп күтілуде. Сарапшылар мұны Таяу Шығыстан экспортталатын мұнай көлемінің көбеюімен және G7 елдерінің стратегиялық қорларды нарыққа шығаруымен байланыстырады.
Мұнайдың арзандау болжамына қарамастан, талдаушылар Қазақстан экономикасының алдағы бір жылдағы өсімін 4,4 пайыз деңгейінде сақталады деп бағалады. Экономиканың алға жылжуына ірі инвестициялық жобалардың жүзеге асырылуы мен қаржыландыру шарттарының жеңілдеуі демеу болмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
