Президенттің Қазақстан халқына арнаған Жолдауында салық заңнамасына қатысты айтылған өткір сыны Үкімет мүшелерін, әсіресе жаңа Салық кодексін әзірлеуге жауапты шенеуніктерді тығырыққа тіреді. Қоғам белсендісі Ғалым Байтұқ министрлердің кабинеттік есептері мен елдегі шынайы ахуалдың арасында жер мен көктей айырмашылық барын айтып, министрлер кабинетінің кәсіпкерлермен байланыс орната алмауын қатаң сынады, деп хабарлайды Ertenmedia.kz.
15 күнде өзгерген көзқарас
Қоғам белсендісінің назарын Үкімет риторикасы мен Мемлекет басшысы ұстанымының арасындағы ашық қайшылық аударған. Оның айтуынша, осыдан небәрі он бес күн бұрын ғана Премьер-министрдің орынбасары Серік Жұманғарин салық реформасын мақтап, оның бағытынан таюға болмайтынын кесіп айтқан еді.
«Салық реформасы сәтті шығып қана қоймай, өзін тамаша деңгейде көрсетіп отыр. Ал оның негізгі ережелерін қайта қарау – нағыз ақылсыздық», – деген болатын вице-премьер.
Алайда арада екі апта өткенде Президент Тоқаев салық заңнамасы кәсіпкерлердің нағыз бас ауруына айналғанын мәлімдеді. Мемлекет басшысы заңдағы қайшылықтарды шұғыл жоюды және бизнеске түскен негізсіз ауыртпалықты алып тастауды тікелей тапсырды. Осылайша, министрлер кабинеті «мінсіз» деп дәріптеген құжаттың шикілігін мемлекеттің бірінші басшысы деңгейінде мойындауға тура келді.
Шағын бизнеске берілген үш жылдық тыныштық
Ғалым Байтұқтың ойынша, Жолдаудағы ең маңызды жаңалық – Президенттің 2027 жылдың 1 қаңтарынан бастап шағын және микробизнесті тексеруге үш жылдық мораторий енгізу жөніндегі ұсынысы болды. Белсенді бұл бастаманы өте дер кезінде жасалған әрі кәсіпкерлерді құтқаратын нақты қадам ретінде бағалайды.
Оның пайымдауынша, мемлекеттің басты міндеті тек салық жинау ғана емес, сол салықты өз маңдай терімен төлеп, халықты жұмыспен қамтып отырған кәсіп иелеріне жағдай жасау болуы тиіс. Шағын кәсіпті шексіз қадағалаудан босату экономиканың нақты тынысын ашуға жол береді.
Кері байланыстың жоқтығы және кабинеттік иллюзия
Белсенді Үкіметтің халықпен және нарықпен жұмыс істеу мәдениетіне шүйлігіп, орынды сауал тастады. Кәсіпкерлердің айлап айтып келген жанайқайын есту үшін міндетті түрде Президенттің араласуы неге қажет болды? Үкіметтің халық үнін еститін өз тетіктері қайда қарап отыр?
Оның көзқарасынша, министрлер заңдарды кабинеттен шықпай, өмірдің нақты шындығынан алшақ жағдайда жазады, ал зардабын қарапайым жұмыс берушілер тартады.
«Салық реформасының сәттілігі бюджетке түскен қосымша триллиондармен ғана өлшенбейді. Ең бастысы – сол триллиондарды адал еңбегімен тауып отырған бизнестің ертеңгі күнге деген сенімі болуы керек. Реформа адал кәсіпкердің өмірін жеңілдетуге тиіс, оны тексерулер мен айыппұлдармен күресетін майданға айналдыруға болмайды», – деп жазды Ғалым Байтұқ.
Қоғам қайраткері сөзін түйіндей келе, осы Жолдаудан кейін Үкімет құр мақтаныштан арылып, кемшіліктерін дер кезінде мойындауды және кәсіпкерлермен шынайы диалог орнатуды үйренеді деп үміттенетінін білдірді. Өйткені экономиканың күші бюджеттің көлемімен емес, еркін әрі қауіпсіз жұмыс істейтін шағын бизнестің қуатымен бағаланады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
