Шымкент қаласында тұрмыстық қалдықты термиялық әдіспен өңдеп, электр энергиясын өндіретін заманауи кешеннің құрылысы басталды. Жоба тәулігіне шамамен мың тонна қоқысты кәдеге жаратуға мүмкіндік береді, – деп жазады Ertenmedia.kz.
Құрылыс алаңында арнайы капсула салу рәсімі өтіп, оған қала әкімі Ғабит Сыздықбеков пен Shaanxi Construction Engineering Kazakhstan компаниясының басшылығы қатысты. Инвестициялық жоба Президент Қасым-Жомарт Тоқаевтың қалдықтарды басқару жүйесін жетілдіру және экологиялық инфрақұрылымды жаңарту жөніндегі тапсырмалары аясында қолға алынды. Кешен «Таза Қазақстан» бағдарламасының негізгі міндеттерімен де сабақтасады.
Зауыттың жобалық қуаты тәулігіне мың тонна немесе жылына шамамен 360 мың тонна тұрмыстық қалдық өңдеуге есептелген. Кәсіпорын қоқысты термиялық жолмен кәдеге жаратып, 24 мегаватқа дейін электр қуатын өндіреді. Жобаға шамамен 54 млрд теңге жеке инвестиция тартылмақ.
Құрылыс жұмысы 2026-2028 жылдар аралығында жүргізіледі. Кешен пайдалануға берілген соң кемінде 80 тұрақты жұмыс орнын ашу жоспарланған. Жаңа өндіріс коммуналдық қалдықты полигондарға көму көлемін айтарлықтай азайтуға тиіс.
Термиялық өңдеуден қалған күл де толықтай тасталмайды. Оны арнайы технология арқылы құрылыс материалдарын өндіруге пайдалану көзделген. Осылайша кешен қалдықты жоюмен шектелмей, одан энергия мен қайталама өнім алатын айналмалы экономика қағидатына сүйенеді.
Жобаның басталуына Шымкент әкімінің 2024 жылы Қытайға жасаған жұмыс сапары негіз болған. Ғабит Сыздықбеков Сиань қаласындағы өндіріс орындарымен танысып, әлеуетті инвесторлармен келіссөз өткізген. Кейін қала әкімдігі, Экология және табиғи ресурстар министрлігі мен қытайлық компания арасында тиісті келісімдер жасалды.
Shaanxi Construction Engineering компаниясының қалдықты энергетикалық тұрғыда кәдеге жарату жобаларын іске асыруда тәжірибесі бар. Инвестор технологиялық желіні салумен қатар, нысанды іске қосуға және қажетті мамандарды даярлауға қатысады. Қала билігі жоба барлық экологиялық және өндірістік қауіпсіздік талабына сай жүзеге асырылатынын мәлімдеді.
Ғабит Сыздықбеков кешенді Шымкент үшін маңызды экологиялық жобалардың бірі деп атады. Оның айтуынша, зауыт қалдықтарды басқарудың жаңа үлгісін енгізіп, қоршаған ортаға түсетін салмақты азайтады. Электр энергиясын өндіру жобаның экономикалық тиімділігін де арттырмақ.
Шымкентте тәулігіне мың тоннаға жуық тұрмыстық қалдық пайда болады. Сондықтан жаңа кешен қаланың қазіргі қоқыс көлемінің елеулі бөлігін өңдеуге мүмкіндік береді. Жоба жоспарға сай орындалса, Шымкент қоқысты тек көметін қаладан оны энергия мен жаңа өнімге айналдыратын мегаполиске қадам басады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
