Алматы облысындағы заңды ойын бизнесі субъектілері 2026 жылдың алғашқы алты айында мемлекеттік бюджетке 25 млрд теңге салық төледі. Соның 10,6 млрд теңгесі өңірлік бюджет кірісіне бағытталды, – деп жазады Ertenmedia.kz.
Соңғы екі жарым жылда ойын бизнесінен мемлекеттік бюджетке жалпы 184,7 млрд теңге түскен. Оның 53,8 млрд теңгесі Алматы облысының қазынасына аударылды. Көрсеткіш саладағы салық түсімінің өңір экономикасындағы салмағын айқын көрсетеді.
Қазір Қонаев қаласында ойын бизнесіне қатысты 21 нысан жұмыс істейді. Олардың қатарында бес казино, 13 букмекерлік кеңсе және үш ойын автоматтары залы бар. Салада шамамен 2,5 мың адам еңбек етеді.
Ойын бизнесі Қонаевтың туризм және қызмет көрсету нарығына да ықпал етіп отыр. Алматы облысы Туризм басқармасының мәліметінше, өңірдегі казиноларға келушілердің шамамен 20 пайызы – шетел азаматтары. Туристер қонақүй, қоғамдық тамақтану, көлік, сауда және өзге де қызмет түрлерін пайдаланады.
Туризм басқармасының басшысы Қуанышбек Мирамбекұлының айтуынша, туристік ағын шағын және орта бизнестің дамуына қосымша серпін береді. Қонақтардың көбеюі жаңа жұмыс орындарының ашылуына және жергілікті сервистің кеңеюіне ықпал етеді. Нәтижесінде ойын бизнесінен тыс салаларда да экономикалық белсенділік артады.
«Ойын бизнесі туралы» заң аясында Талғар ауданында тек шетел азаматтарына арналған жаңа ойын аймағын құру жоспарланып отыр. Бастама қоғамдық кеңесте қаралып, оң қорытынды алған. Жобаның нақты іске асу мерзімі мен инвестициялық шарттары кейінгі кезеңде айқындалмақ.
Талғар ауданы жаңа аймақты орналастыруға қолайлы аумақ ретінде ұсынылған. Аудан Алматы қаласы мен халықаралық әуежайға жақын орналасып, тау туризмі, сауықтыру және демалыс бағытындағы инфрақұрылымымен ерекшеленеді. Мұнда «Ақбұлақ» спорттық-сауықтыру кешені, Oi-Qaragai тау-шаңғы курорты, Aquaasia Resort және Tal Resort секілді туристік нысандар жұмыс істейді.
Қуанышбек Мирамбекұлының сөзінше, жаңа ойын аймағын Талғардың туристік экожүйесіне кіріктіру көзделген. Жоба шетелдік қонақтарға ұсынылатын қызмет аясын кеңейтіп, қонақүй, мейрамхана, көлік және сауда саласына жаңа мүмкіндік беруі мүмкін. Сонымен бірге өңірге инвестиция тартып, бюджет кірісін арттыру міндеті қойылып отыр.
Алайда экономикалық тиімділікпен қатар қоғамдық қауіпсіздік, қаржылық бақылау және жауапты ойын қағидаттары да назардан тыс қалмауға тиіс. Тек шетел азаматтарына арналған аймақтың қызметі заң талаптарына, салық тәртібіне және қылмыстық табысты жылыстатуға қарсы бақылауға толық бағынуы қажет. Жобаның нақты нәтижесі түскен салықпен ғана емес, өңір экономикасына әкелген тұрақты жұмыс орны мен сапалы инвестиция арқылы бағаланбақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
