Қорғаныс министрлігін кешенді тексерудің алғашқы кезеңінде мүлікті талан-таражға салу және өкілеттікті асыра пайдалану баптары бойынша 13 қылмыстық іс қозғалды, деп хабарлайды Ertenmedia.kz.
Президент Тоқаев әскердегі ахуалды тексеретін арнайы комиссия мүшелерімен кеңес өткізді. Комиссия төрағасы, Қауіпсіздік кеңесі төрағасының орынбасары Аида Балаева Мемлекет басшысына жүргізілген жұмыстың алғашқы нәтижелерін баяндап, қарулы күштерде қордаланған жүйелі кемшіліктерді ортаға салды.
Жоспарлаудағы салғырттық пен қамауға алынған командирлер
Тексеру барысында Маңғыстау облысындағы 14 жауынгердің өмірін қиған қайғылы оқиғаға әкелген себептер жіті сараланды. Алдын ала тергеу әскери жаттығуларды ұйымдастыру кезінде өрескел қателіктер жіберілгенін және қауіп-қатерлердің мүлдем ескерілмегенін көрсетті.
Атап айтқанда, десант түсіруді жоспарлау және жауынгерлердің жеке қауіпсіздігін қамтамасыз ету шаралары салғырт орындалған. Қолбасшылық құрамның қылмысқа пара-пар жауапсыздығы дерегі бойынша тергеу амалдары жүргізіліп, қазіргі уақытта бес лауазымды тұлға қамауға алынды.
Тергеу аяқталған соң олардың іс-әрекетіне түпкілікті құқықтық баға беріледі.
Мемлекет мүлкін жымқыру және әлімжеттік деректері
Комиссия зерделеуі бір ғана оқиғамен шектелмей, бүкіл министрлікке қарасты құрылымдардың қызметін қамтыды. Құқық қорғау органдары мемлекет мүлкін талан-таражға салу, қызметтік өкілеттікті асыра пайдалану деректері бойынша қозғалған 13 қылмыстық істі тергеуге кірісті.
Сондай-ақ әскери тәртіп пен тәрбие жұмысындағы олқылықтар да әшкереленді. Әскери қызметшілерге әлімжеттік жасау және жарғы талаптарына қайшы келетін әрекеттер бойынша да бөлек қылмыстық істер қозғалған.
Президент Тоқаев алғашқы кадрлық шешімдердің қабылданғанын, алайда әскери қызметшілердің қазасына кінәлі әрбір лауазым иесі заң бойынша қатаң жауапқа тартылуы шарт екенін ескертті. Аталған мәселені Мемлекет басшысы жеке бақылауына алды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
