Қазақстанның Денсаулық сақтау министрлігі азаматтардың міндетті әлеуметтік медициналық сақтандыру жүйесіне қатысуы туралы ақпарат беретін мемлекеттік қызмет ережелеріне өзгерістер әзірледі. Жоба сақтандыру мәртебесі мен төленген жарналар туралы мәлімет алуды жеңілдетуге бағытталған. Қызмет қазір сақтандыру жүйесіне қатысатын 17,5 миллион азаматқа арналған, деп жазады Ertenmedia.kz.
Түзетулер әзірге жобалау сатысында тұр. Денсаулық сақтау министрлігінің хабарламасында өзгерістердің нақты тұжырымдары мен күшіне енетін күні көрсетілмеген. Ведомствоның негізгі мақсаты – азаматтардың сақтандыру мәртебесі жөніндегі ақпаратты алу рәсімін түсінікті әрі ыңғайлы ету.
Қолданыстағы мемлекеттік қызмет арқылы азамат сақтандыру жүйесінің қатысушысы екенін тексере алады. Сонымен бірге сақтандырумен қамтылған кезеңдер және төленген жарналар мен аударымдар туралы ақпарат беріледі. Осылайша, пайдаланушы жүйедегі мәртебесіне әсер етуі мүмкін бос айларды алдын ала анықтай алады.
Өтініш Әлеуметтік медициналық сақтандыру қорының ақпараттық жүйесінде өңделеді. Қолданыстағы ереже бойынша жауап 15 минут ішінде дайындалуға тиіс. Нәтиже электрондық үкімет порталындағы пайдаланушының жеке кабинетіне жіберіледі.
Қызметті eGov.kz электрондық үкімет порталы арқылы алуға болады. Мемлекеттік органға немесе Әлеуметтік медициналық сақтандыру қорына жеке барудың қажеті жоқ. Өтініш электрондық цифрлық қолтаңбамен немесе порталдағы есептік жазбаға тіркелген телефон нөміріне жіберілетін бір реттік құпиясөзбен расталады.
Нәтиже пайдаланушыға электрондық құжат түрінде беріледі. Құжатта «Міндетті әлеуметтік медициналық сақтандыру тұтынушысы» немесе «Міндетті әлеуметтік медициналық сақтандыру тұтынушысы емес» деген мәртебе көрсетіледі. Сонымен қатар адамның сақтандырумен қамтылған кезеңдері туралы мәлімет ұсынылады.
Сақтандыруды тексеру жеңілдейді
Сақтандырылған азамат төленген жарнаның мөлшері мен өзінің әлеуметтік мәртебесіне қарамастан, медициналық көмектің кең көлемін пайдалана алады. Оған профилактикалық тексеру, консультациялық-диагностикалық көмек және амбулаториялық жағдайда көрсетілетін мамандандырылған ем кіреді. Стационарды алмастыратын және стационарлық жағдайда көрсетілетін медициналық қызмет те сақтандыру жүйесі арқылы қаржыландырылады.
Жүйе жоғары технологиялық медициналық көмек пен оңалту қызметін де қамтиды. Азаматтарға қолданыстағы заңнама аясында дәрі-дәрмекпен қамтамасыз ету қарастырылған. Алайда аталған қызметтерді алу үшін жүйедегі сақтандыру мәртебесі белсенді болуы керек.
Жарналар мен аударымдар сақтандыру аясындағы медициналық көмекке қол жеткізуге тікелей әсер етеді. Сондықтан жұмыс орнын ауыстырған, жеке кәсіпкер ретінде тіркелген, ресми еңбек қатынасынсыз жүрген немесе жарнаны өз бетінше төлеген азаматтарға мәртебесін жүйелі тексерген дұрыс. Жақында дербес төлем жасаған адамдар да оның ақпараттық жүйеге түскенін нақтылап алғаны жөн.
Нақты төлемдер мен ақпараттық жүйедегі мәлімет арасында айырмашылық анықталса, Әлеуметтік медициналық сақтандыру қорына жүгіну қажет. Мәселені медициналық көмек керек болған сәтке дейін шешкен дұрыс. Төлем түбіртектері мен аударым жасалған кезеңдер туралы құжаттарды сақтап қойған жөн.
Ережелерге ұсынылған түзетулер әзірге жоба күйінде қалып отыр. Жаңа рәсімнің нақты шарттары мен күшіне енетін мерзімі құжатты әзірлеу аяқталып, ол ресми жарияланғаннан кейін белгілі болады. Сол уақытқа дейін сақтандыру мәртебесі қолданыстағы тәртіп бойынша eGov.kz порталы арқылы тексеріледі.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
