Энергетика министрлігі мен Dunga Operating компаниясы арасындағы өнімді бөлу туралы келісім бойынша көпжылдық дау реттеліп, инвесторлар Қазақстанға қаржылық өтемақы төлейтін болды, деп хабарлайды Ertenmedia.kz.
Астанада өткен рәсім барысында тараптар келіспеушіліктерді шешу туралы ресми құжатқа қол қойды. Мәміле мердігердің жекелеген тарихи шығындарын өтеуге қатысты ұзаққа созылған пікірталасқа түпкілікті нүкте қойып, кен орнына ауқымды инвестициялар тартуға жол ашады.
Тарихи шығындар дауы мен сотсыз шешім
Маңғыстау облысында орналасқан Доңға мұнай-газ кен орнын игеру 1994 жылы жасалған өнімді бөлу туралы келісімшарт шеңберінде жүргізіліп келеді. Алайда өндірілген мұнай есебінен өтелетін шығындардың тізіміне қатысты мемлекет пен консорциум арасында көптен бері келіспеушілік туындап, жобаның толыққанды дамуын тежеген еді.
Келіссөздер нәтижесінде халықаралық сот процестерінсіз мемлекеттік мүддені қорғайтын ортақ шешім қабылданды. Энергетика министрі Ерлан Ақкенженов пен оператор компанияның бас директоры Нұржан Әбдірахманов бекіткен келісім консорциумның шетелдік серіктестері Oman Oil Company Limited және PTTEP Corporation компанияларына қол қою үшін жолданды.
Ведомство басшысы уағдаластықтың ел экономикасына берер пайдасы зор екенін мәлімдеді.
«Доңға кен орнының әлеуеті жоғары және елдің энергетика саласы үшін стратегиялық маңызға ие. Жобаға ұзақ уақыт бойы жинақталған өтелмейтін шығыстарға қатысты даулы мәселелер кедергі келтіріп келді. Қол жеткізілген уағдаластықтар ұзаққа созылатын сот рәсімдеріне жүгінбей-ақ мемлекеттің экономикалық мүдделерін қорғауға мүмкіндік береді және жаңа инвестициялық циклге жол ашады», – деп атап өтті министр.
2039 жылға дейінгі жаңа инвестициялық жоспар
Даудың бейбіт шешілуі кен орнын игерудің 2026-2039 жылдарға арналған жаңа кешенді жоспарын жүзеге асыруға мүмкіндік берді.
Бекітілген құжатқа сәйкес, аталған кезеңде 67,4 миллион баррель мұнай өндіру жоспарланған. Сонымен қатар өндірістік процестерді жаңғырту үшін жобаға қомақты көлемде күрделі және операциялық инвестициялар тартылады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
