Жасанды интеллекттің әзірлеу мен киберқауіпсіздікке әсері туралы айтатын болсақ, бұл тақырыптың төңірегінде ажиотаж көп болғанымен, оның артында нақты құндылық бар. ЖИ көптеген адамға әзірлеуші мамандығына келуге жол ашқанымен, білімі жоқ адамның бірден үлкен жоба жасап шығуы екіталай, деп пікір білдірді Freedom Bank атқарушы директоры Ренат Туканов, деп хабарлайды Ertenmedia.kz.
Кәсіби сараптаманы ешкім жоққа шығарған жоқ. Адамға негіздерді үйреніп, пәндік салаға терең бойлау үшін бәрібір уақыт жұмсауға тура келеді. Қарапайым мысал келтірейік: бүгінде ChatGPT немесе Claude бірнеше секунд ішінде жиырма беттік құжат дайындап бере алады. Бірақ бұл жиырма бетті әлі оқып, тексеріп, саралап, нақты тапсырмамен сәйкестендіру қажет.
Фундаменталды білім мен университеттердің рөлі
Кез келген мамандықта да осы жағдай. Сарапшы болу үшін іргелі қағидаларды меңгеріп, практикалық тәжірибе жинақтау қажет. Сондықтан жасанды интеллект университеттер мен толыққанды кәсіби білім беруді алмастыра алады деуге әлі ерте.
Оқу, жалпы алғанда, оңай шаруа емес. Дәл осы себепті адамдарға бір кеште ЖИ көмегімен жасалған жоба бағдарламашылардың қажетсіздігін дәлелдегендей көрінеді. Негізінде, бұл жерде дамуға, жоғары жүктемеге және ұзақ мерзімді пайдалануға есептелмеген демалыс күнінің бір реттік жобасы туралы сөз болып отыр.
Код жазу және киберқауіпсіздіктегі нақты қауіптер
ЖИ код жазуды шынымен жылдамдатады. Дегенмен, кодтың өзі кез келген күрделі IT-жобаның тек бір бөлігін ғана құрайды. Одан бөлек жүйе архитектурасы, инфрақұрылым мен есептеу ресурстарын таңдау, тестілеу, орналастыру, сүйемелдеу, масштабтау және деректерді қорғау мәселелері бар. Кәсіби білімсіз бұл міндеттер өздігінен шешілмейді.
«Киберқауіпсіздікте ескі ереже жұмыс істейді: егер бейберекетсіздікті автоматтандырсаңыз, автоматтандырылған бейберекетсіздік шығады. Бағдарламалауды білетін маман ЖИ-ді қуатты құрал ретінде пайдаланады және оның қателерін байқай алады», – деп атап өтті Ренат Туканов.
Дайындығы жоқ адамға жүйе құрастырып берген жауап дұрыс әрі қауіпсіз болып көрінуі мүмкін, бірақ кодтың ішінде қатерлі олқылықтар болуы ғажап емес. Мәселен, тәжірибелі әзірлеуші үшін құпия сөздер мен қолжетімділік кілттерін тікелей кодта сақтауға болмайтыны белгілі. Ал жаңадан бастаған адам мұны білмеуі мүмкін. Мұнда әңгіме үйдің үйреншікті кілті емес, серверге, деректер базасына немесе бұлтты инфрақұрылымға жол ашатын цифрлық кілттер туралы болып отыр. Олардың қолды болуы бүкіл жобаны қауіпке тігуі мүмкін.
Сондықтан ЖИ-дің таралуымен киберқауіпсіздік саласындағы сұрақтар көбейе түседі. Сонымен қатар, жасанды интеллект кодты жылдам талдауға, осалдықтарды табуға және қауіп-қатерге жедел әрекет етуге көмектесуде. Тек ЖИ-ді қолданатын адам емес, оның мүмкіндіктерін іргелі біліммен және кәсіби сараптамамен ұштастыра білген маман жеңіске жетеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
