Freedom SuperApp қосымшасындағы «Менің денсаулығым» бөлімі дәрігерге жазылу, дәрі іздеу және медициналық анықтама алу қызметтерін бір жерге біріктірген. Алайда кешбэк көрсетілгеніне қарамастан, дәрі бағасын өзге сервистермен салыстырып алған тиімді, – деп жазады Ertenmedia.kz.
Бөлімге кірген пайдаланушы міндетті әлеуметтік медициналық сақтандыру мәртебесін, дәрігерге жазылған уақытын және денсаулығына қатысты негізгі көрсеткіштерді көре алады. Осы жерден дәрігер қабылдауына жазылып, қажетті препаратты немесе медициналық анықтаманы іздеуге болады. Бір қосымшадағы мұндай экожүйе күнделікті медициналық қызметтерге жұмсалатын уақытты қысқартады.
Маман іздегенде қажетті санатты таңдап, рейтинг, қабылдау күні және орналасқан жері бойынша сүзгі қолдануға мүмкіндік бар. Дәрігердің жеке парақшасында еңбек өтілі, рейтингі, жұмыс істейтін клиникасы, қабылдау құны және бос уақыты көрсетіледі. Мысалы, бір маманның 12 мың теңгелік қабылдауы 7 820 теңгеге дейін арзандап, кешбэкті есептегендегі құны 6 256 теңге болған.
Пайдаланушы клиниканы, күнді және қабылдау уақытын қосымшаның ішінде бірден таңдайды. Каталогта медициналық орталықтар мен түрлі бейіндегі мамандар ұсынылған. Осы жағынан сервис дәрігер іздеу мен қабылдауға жазылу үдерісін едәуір жеңілдетеді.
Дәрі-дәрмек каталогында препаратты атауы және сату мекенжайы бойынша іздеуге болады. Дегенмен кешбэк тауардың нарықтағы ең арзан нұсқа екенін білдірмейді. Finratings.kz жүргізген салыстыруда Freedom SuperApp-тағы кей дәрінің бағасы i-teka.kz сервисінен табылған ұсыныстардан жоғары болған.
Freedom SuperApp-та «Флемоксин Солютаб» 1000 мг №20 препараты 6 950 теңге, ал кешбэкті есептегенде 6 603 теңге тұрған. i-teka.kz платформасында сол дәрі 4 100 және 4 280 теңгеден ұсынылған. Айырмашылық кешбэк қолданылғаннан кейін де 2 мың теңгеден асып отыр.
«Урсосан» 250 мг №100 препараты қосымшада 16 500 теңгеге сатылып, кешбэктен кейінгі бағасы 15 675 теңгені құраған. i-teka.kz сервисіндегі ұсыныстар 12 720-13 420 теңге аралығында болған. Екі мысалда да Freedom ұсынған кешбэк нарықтағы төмен баға айырмасын жаба алмаған.
Тапсырыс сомасына жеткізу ақысы да қосылуы ықтимал. Freedom сервисінде жеткізу құны 700 теңге болса, 5 мың теңгеден жоғары тапсырыс тегін жеткізіледі. Бағалар мен қолжетімділік өзгеріп отыратындықтан, дәріні сатып алар алдында бірнеше дәріхана мен агрегатордағы түпкі соманы салыстырған дұрыс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
